अनिल नेपाली
अर्घाखाँचीको सन्धिखर्क नगरपालिका वडा नम्बर २ बाट भैंसीलाई निर्ममता पूर्वक यातना दिई ओसारपसार गर्ने २ जना पक्राउ परेका छन् ।पक्राउ पर्नेमा जिल्लाको भूमिकास्थान नगरपालिका वडा नम्बर ६ का २३ वर्षीय सरोज पौडेल र रोल्पा लुङ्ग्री गाउँपालिका वडा नम्बर २का १८ वर्षीय क्रिस बानिया रहेको जिल्ला प्रहरी कार्यालय अर्घाखाँचीले जनाएको छ ।
मंगलबार राति सन्धिखर्क नगरपालिका वडा नम्बर २ घोचे खोलाबाट प्रहरीले धारापानी तर्फबाट सन्धिखर्क आउँदै गरेको लु १ च ३८२६नम्बरको सिङ्गल क्याप बोलेरो गाडी रोकी चेकजाँच गर्दा, गाडीको पछाडिको ढालामा ४ वटा भैंसीहरू साँघुरो ठाउँमा अटाई नअटाई क्रूरव्यवहारका साथ बुटवलतर्फ लैजाने तयारीमा रहेको फेला पारेको जिल्ला प्रहरी कार्यालय अर्घाखाँचीका प्रहरी नायव उपरिक्षक चक्रबहादुर मल्लले जानकारी दिनुभयो ।
साँघुरो ठाउँ र यातनाका कारण गाडीमा ठोकिएर भैंसीहरू घाइते अवस्थामा भेटिएको छ । प्रहरीले गाडी, भैंसी र दुबै व्यक्तिलाई नियन्त्रणमा लिई मुलुकी अपराध संहिता २०७४ बमोजिम पशुपक्षी सम्बन्धी कसूर मुद्दामा म्याद थप गरीथप अनुसन्धान थालेको सूचना अधिकारी झलक प्रसाद शर्माले जानकारी दिनुभयो ।
