गुल्मी । गुल्मीको रुरुक्षेत्र गाउँपालिका अध्यक्ष र प्रमुख प्रशासकीय अधिकृतको कार्यकक्षमा लगाइएको ताला खुलेको छ । श्रावण २ गते शुक्रबार पाँचौ दिनमा जिल्ला सुरक्षा समिति समेतको पहलमा ताला खुलेको हो ।
असार ३० गते नेकपा एमाले रुरुक्षेत्र गाउँकमिटीले विद्यालयमा स्मार्ट बोर्ड खरिदमा अनियमितताको आरोप लगाउदै अध्यक्ष यदु ज्ञवाली र प्रमुख प्रशासकीय अधिकृत लक्षमण पाण्डेको कार्यकक्षमा तालाबन्दी गरेको थियो ।
पालिकाले तालाबन्दी खोल्ने बिषयमा सहजिकरण नगरेपछि जिल्ला सुरक्षा समितिको पहलमा नेपाल प्रहरी र नगर प्रहरीले ताला खोलेका हुन् । पाँच दिनसम्म पालिका अध्यक्ष र प्रमुख प्रशासकीय अधिकृतको कार्यकक्षमा तालाबन्दी हुँदा सेवा प्रवाहमा असर परेको थियो ।
स्मार्ट बोर्ड खरिदको लागि चैत २३ गते रुरुक्षेत्रको गाउँ शिक्षा समिति र २५ गते गाउँ कार्यपालिकाबाट निर्णय भएको थियो । उक्त निर्णय कार्यान्वयनमा प्रक्रिया नपुगेको भन्दै एमालेबाट निर्वाचित उपाध्यक्ष सहितका २८ जना जनप्रतिनिधिहरुले अध्यक्षलाई ध्यानाकर्षण पत्र बुझाउनुका साथै एमालेले पालिकामा तालाबन्दी गरेको थियो ।
प्रमुख प्रशासकीय अधिकृत लक्षमण पाण्डेले आफुहरुले कतै पनि किर्ते काम नगरेको प्रतिक्रिया दिदै तालाबन्दी राजनीतिक बिषय भएकोले विवाद सामान्य भएमा आइतबारदेखि कार्यकक्षमै बसेर सेवा दिने बताए ।
तालाबन्दी खुलेपछि नेकपा एमाले रुरु क्षेत्र गाउँपालिकाका नेता कार्यकर्ता रुष्ट बनेका छन । एमालेका स्थानिय नेता रामचन्द्र गौतमले आफ्नो सामाजिक संजाल फेसबुकमा असन्तुष्टी पोख्दै लेखेका छन – रुरु गाउपालिका स्मार्ट बोर्ड अनियमितता प्रकरणमा नेकपा एमालेले लगाएको ताला बिना संबाद ,राजनितिक मर्यादा बिपरित शत्ता र शक्तिको घमण्डमा लज्जास्पद तरिकाले अनियमिततालाई प्रशय दिने गरी प्रशासनले खोलेको छ ।
उनले अगाडि लेखेका छन – चेतावनी दिन चाहान्छौ ,जनताको बिश्वास मिच्ने, कानुनलाई मजाक सम्झिनेर भ्रष्टाचार जोगाउन लायलित हुने प्रशाशनको निन्दनीय गैर जिम्मेबार कार्यको कडा शब्दमा भर्त्सना गर्दै दोषी उपर छानबिन नभएसम्म संघर्षका कार्यक्रम अझै चर्किने र त्यसबाट उत्पन्न परिणामको स्वयं प्रशासन नै जिम्मेबार हुनेछ । भ्रष्टाचारको शत्रु हो एमाले ,चुप लागेर बस्नेवाला छैन ।जय रुरु ,जय एमाले ।
त्यस्तै असार ३० गतेको तालाबन्दी गैरजिम्मेवार र अव्यहवारिक भएको भन्दै एमाले बाहेकका स्थानिय पार्टीहरु, संघ/सङ्गठन र स्थानिय सेवाग्राहीहरुले विरोध गर्दै आइरहेका थिए ।
