३२ असार, बुटवल । केहि दिन यता दैनिक लुम्बिनी पत्रिकामा प्रकाशन भएको विज्ञापनका विषयमा आज बुटवल बाट प्रकाशित केही पत्रीकाका समाचारमा मन्त्रीलाई नै जोडेर तथ्यहीन समाचार प्रकाशन गर्नु निन्दनीय भएको दैनिक लुम्बिनी पत्रीकाले बताएको छ ।
असार ३२ गते (आज) दैनिक लुम्बिनी पत्रीकाका प्रवन्ध निर्देशक महेश रिजाल द्धारा हस्ताक्षरित विज्ञप्तिमा पत्रकार आचार संहिताको समेत ख्याल नगरी अर्को सञ्चारमाध्यम विरुद्ध विना प्रमाण निहीत स्वार्थ र पुर्वाग्रहमा प्रेरित भएर समाचार प्रकाशन गर्नु अनुचित भएको बताउदै अनर्गल प्रचार प्रति गम्भीर ध्यानाकर्षण भएको बताइएको छ ।
-विज्ञप्तिमा अगाडी भनिएको छ : निजी क्षेत्रबाट ३७ वर्षदेखि निरन्तर प्रकाशित नेपालकै पुरानो र गौरवपूर्ण इतिहास बोकेको ‘क’ वर्गको राष्ट्रिय दैनिक लुम्बिनीको प्रकाशन संस्था सिद्धार्थ पब्लिकेसन्स प्रा.लि. प्रकाशन तथा प्रशारण समाजबाट अलग भएको छ ।
पत्रिकामा प्रकाशित सरकारी विज्ञापन र यस संग लुम्बिनी प्रदेश सरकारका भौतिक पूर्वाधार विकास मन्त्री भुमिश्वर ढकाललाई जोडेर लाञ्छित गर्ने गरी केही सञ्चार माध्यममा प्रकाशित समाचार प्रति प्रालिले गम्भीर ध्यानाकर्षण भएको जनाएको छ ।
‘जनपक्षीय पत्रकारिता मार्फत स्वच्छ छवि कायम गर्दै अघि बढेको पत्रिकामा प्रकाशन भएको विज्ञापनका विषयमा मन्त्रीलाई जोडेर तथ्यहीन समाचार प्रकाशन गर्नु निन्दनीय छ नै,पत्रकार आचार संहिताले समेत अर्को सञ्चार माध्यम विरुद्ध विना प्रमाण निहीत स्वार्थ र पुर्वाग्रह प्रेरित भएर समाचार प्रकाशन गर्नु अनुचित भनेको छ’–प्रालिले निकालेको विज्ञप्तिमा उल्लेख छ ।
तहगत सरकारका विभिन्न कार्यालयबाट विज्ञापनहरु स्वभाविक प्रक्रियाबाट नै प्राप्त हुने विषयलाई सहन / स्वीकार गर्न नसकी फरक सञ्चार माध्यम र मन्त्रीलाई तथ्यहीन आरोप लगाएर संगठित रूपमा प्रायोजित समाचार प्रकाशन गर्नुले मर्यादित पत्रकारिता माथि नै प्रश्न उब्जाएको विज्ञप्तिमा उल्लेख छ ।
कुनै सञ्चारमाध्यममा कहिलेकांही एक दुई वटा विज्ञापन बढी छापिंदैमा व्यवसायिक धर्म र मर्यादा बिर्सेर अर्नगल प्रचार गर्नु गलत भएको विज्ञप्तिमा उल्लेख छ ।
प्रकाशन तथा प्रसारण समाज लुम्बिनीका अगुवाहरु नै बसेर निर्णय गर्ने र कसै माथि संगठित प्रहार गर्ने गैर–व्यवसायिक र बदनियतपूर्ण क्रियाकलाप प्रति खेद व्यक्त गर्दै सञ्चालक समितिको निर्णय अनुसार सिद्धार्थ पब्लिकेशन प्रा.लि. उक्त समाजबाट अलग भएको सरोकारवाला सबैमा जानकारी गराएको छ । प्रालिले सदैव जनपक्षीय, स्वच्छ र मर्यादित पत्रकारितामा अविचलित भएर लागिरहने प्रतिबद्धता व्यक्त गरेको छ ।
