३१ असार, प्युठान । प्युठानमा आफ्नै पूर्व श्रीमानले चक्कु प्रहार गरी आफन्तको घरमा बस्न गएकी एक महिलाको हत्या गरेका छन् ।
प्युठानको सरुमारानी गाउँपालिका–३ गोठेरीकी २८ वर्षीया रुक्मनी बरालको हत्या उनका पूर्व पति लिलबहादुर बरालले गरेका हुन ।
हत्या अभियोगमा ऐरावती गाउँपालिका–२ कात्तिकेका ३० वर्षीय लिलबहादुरलाई प्रहरीले घटनास्थलबाटै पक्राउ गरेको जिल्ला प्रहरी कार्यालय प्युठानका प्रहरी निरिक्षक निराजन रिजालले जानकारी दिए ।
रुक्मणी आफ्नी जेठानी डिला परियारको घरमा बस्न गए को समयमा आज बिहान १० बजेर १० मिनेट तिर उनको हत्या भएको हो । डिलाका अनुसार, लिलबहादुरले रुक्मनीलाई फोन गरेर भेट्न बोलाएका थिए। उनीहरू घरभित्र पुगेपछि लिलबहादुरले चक्कु प्रहार गरी हत्या गरेका हुन् ।
पूर्व पति लिलबहादुर बराल वैदेशिक रोजगारीमा रहेकै बेला रुक्मनीले गत वैशाखमा दिपक परियारसँग दोश्रो विवाह गरेकी थिइन । दिपक १५ दिनअघि कामको सिलसिलामा संखुवासभा गएकाले घटनाका बेला उनी घरमा थिएनन् ।
पुर्व पति लिल बहादुरले कि सङ्गै बसौँ हैन भने सम्बन्धविच्छेद चाहियो भन्दा रुक्मणीले नमानेको कारण लिल बहादुरले हत्या गरेको प्रारम्भिक अनुसन्धान छ ।
रुक्मनी र लिलबहादुरबाट एक छोरा र एक छोरी छन् । आमाको हत्या र बुबाको गिरफ्तारीसँगै ती बालबालिका अभिभावक विहीन बनेका छन । प्रहरीले लिलबहादुरलाई नियन्त्रणमा लिएर घटनाको थप अनुसन्धान भइरहेको जनाएको छ।
