पूर्व–पश्चिम महेन्द्रराजमार्ग अन्तर्गत कावासोती दुम्कीबास खण्डको बीचमा पर्ने चोरमारामा पुल लच्किएको कारण अलपत्र परेका सवारी साधनलाई वैकल्पिक सडकबाट वारपार गराइएको छ ।
जिल्ला प्रहरी कार्यालयका अनुसार चोरमारा बजारबाट केही तल हुँदै गाडी वारपार गराइएको छ । चोरमारा बजारबाट दक्षिणमा रहेको नवजागरण क्याम्पस नजिकबाट गाडी पूर्व–पश्चिम जाने वैकल्पिक सडकबाट गाडी वारपार गराइएकोमा साना र यात्रुवहाक गाडीलाईप्राथामिकतामा राखेर यातायात सञ्चालन गराइएको जिल्ला प्रहरी कार्यालयले जानकारी दिएको छ ।
पूर्वबाट पश्चिम जाँदा चोरमारा बजारबाट दक्षिण लागि तम्सरिया गाउँबाट हाल (पानी नभएको) खोला तरि रानिटार हुँदै फुलबारी अथवा भिउरान हुँदै अरुणखोला निस्कने र पश्चिमबाट आएका सवारी साधनको हकमा फुलबारीबाट दक्षिण लागि रानिटार, तम्सरिया गाउँ हुँदै चोरमारा बजार निस्कन सकिने बताइएको छ ।
आइतबार राति करिब १० बजेतिर नारायणगढ देखि ४२ किलोमिटर पश्चिममा रहेको फलामे पुल लच्किएका कारण राजमार्ग अवरुद्धभएको थियो ।
महेन्द्रराजमार्ग अन्तर्गत पूर्वी नवलपरासीकै दुम्कीबासको फलामे पुल भाँच्चिएको ४ महिनापछि त्यस्तै प्रकृतिको चोरमारा पुल भाँच्चिएको हो । यो फलामे पुल २०३१ सालमा निर्माण गरिएको र अहिले जीर्ण बन्दै गैरहेको थियो ।
