भारतको जम्मु–कश्मिरमा आतंकवादी आक्रमणबाट मृत्यु भएको एक युवा बुटवलका भएको पुष्टि भएको छ । जम्मू–कश्मिर स्थित पहलगाममा मंगलबार पर्यटकको समूहमाथि भएको आक्रमणमा परी मृत्यु हुनेमा २७ वर्षीय सुदीप न्यौपाने रहेको पुष्टि भएको छ ।
उनि गत शनिबार आमा र दिदी–भिनाजुलाई लिएर घुम्न गएका थिए । मृतक सुदीप बुटवल उपमहानगरपालिका वडा नम्बर १४ कै रहेको सोही वडाका वडाध्यक्ष दधिराम न्यौपानेले जानकारी दिए । वडा अध्यक्ष न्यौपाने र सुदीप नातामा काका भतिज हुन ।
आमासँग बुटवल ११ कालिकानगरमा बस्दै आएका सुदीप धरानमा पब्लिक हेल्थमा पढ्दै आएका थिए । गत शनिबार आमा रिमा पाण्डे, दिदी सुष्मा र भिनाजु उज्ज्वल काफ्ले सहित घुम्न भन्दै कश्मिर गएका सुदीप माथि बन्दुकधारीहरूले बाटोमा हिँड्दै गरेका सुदीपलाई कुन धार्मिक समूह हो भन्दै सोधेपछि एकाएक गोली हानेको थियो उक्त हमलामा उनको ज्यान गएको वडा अध्यक्ष न्यौपानेले जानकारी दिए।
सुदीपको शव बुधबार नेपाल ल्याउने तयारी गरिएको उनले बताए । ‘शवलाई कश्मिरबाट दिल्ली र दिल्लीबाट काठमाडौं ल्याउने तयारी गरिएको छ, अहिले म काठमाडौ जाँदै छु,’ वडा अध्यक्ष न्यौपानेले भने ।
