१६ चैत, गुल्मी । नेपाल पत्रकार महासंघ गुल्मीले राजावादीको नाममा भएको आन्दोलनमा सञ्चार माध्यम र पत्रकार सुरेश रजकको निधन प्रति कालोपट्टी सहित बिरोध सभा सम्पन्न गरेको छ । जिल्ला प्रशासन कार्यालय गुल्मीको गेट अगाडि सम्पन्न भएको यस बिरोध सभामा जिल्लाका विभिन्न सञ्चार माध्यममा कार्यरत पत्रकारहरूको सहभागिता रहेको थियो ।
पत्रकार महासंघ गुल्मीका संस्थापक अध्यक्ष हरिकुमार श्रेष्ठले पत्रकार रजकको निधनप्रति शोक व्यक्त गर्दै, घटनाको स्पष्ट छानबिन र जिम्मेवारलाई कारवाहीको माग गरे । विरोध सभा कार्यक्रममा पत्रकारहरूले कालोपट्टी लगाएर राजावादी आन्दोलनका क्रममा सञ्चार माध्यम र पत्रकारमाथी भएका दमन र आक्रमणको विरोध जनाएका थिए । नेपाल पत्रकार महासंघ गुल्मीका अध्यक्ष अनिल खत्रीले पत्रकारहरूको सुरक्षा र स्वतन्त्रताको रक्षा गर्न सरकारसँग माग गरे ।
उनले मिडियाको स्वतन्त्रता, अधिकार र पत्रकारहरूको सुरक्षा सुनिश्चित गर्न सरकारसँग माग गर्दै, लोकतन्त्रको संस्थागत सुदृढीकरणका लागि निरन्तर संघर्ष गर्ने प्रतिवद्धता व्यक्त गरे । पत्रकार महासंघ गुल्मीले सामूहिक एकताको प्रतीक स्वरूप र राजावादी आन्दोलनप्रति असहमतिका साथ पत्रकारहरूको सुरक्षा र अधिकारको पक्षमा कडा आवाज उठाएको छ ।
