अनिल खत्री
११ चैत, गुल्मी । गुल्मीमा दोस्रो गुल्मी महोत्सव संचालन हुनेभएको छ । गुल्मी चेम्बर अफ कमर्शको तम्घास गुल्मीको आयोजनामा दोस्रो गुल्मी महोत्सव–२०८१ तथा कृषि, पर्यटन, ब्यापार एवम् औद्योगिक मेला २९ चैत २०८१ देखि १३ बैशाख २०८२ सम्म संचालन हुने भएको हो ।
सोमबार गुल्मीको सदरमुकाम तम्घास स्थित कार्यालयमा पत्रकार सम्मेलन गर्दै गुल्मी चेम्बर अफ कमर्सले “गुल्मी जिल्लाको समृद्धिको आधार : कृषि, पर्यटन, उद्योग र ब्यापार” भन्ने मुख्य नारासहित महोत्सवको आयोजना गर्न लागेको जानकारी गराएको हो । चेम्बर अफ कमर्सका सचिव सूर्य घिमिरेले तम्घासको रेसुङ्गा नगरपालिका वडानम्बर–२ स्थित नुनथला भन्ने स्थानमा महोत्सव आयोजना गर्न लागेको पत्रकार सम्मेलनमा जानकारी दिए ।
अध्यक्ष दुर्गाप्रसाद पाण्डेले महोत्सवबाट ३० करोडको आर्थिक कारोबार र डेढ लाख जनाले अवलोकन गर्ने अपेक्षा गरिएको बताए । महोत्सवमा टिकट शुल्क विद्यार्थी ५० रुपैयाँ र अन्य व्यक्तिलाई १०० रुपैयाँ लाग्नेछ ।
७० वर्ष भन्दा माथिका ज्येष्ठ नागरिक, पाँच वर्ष मुनिका बालबालिका र अपाङ्गता भएका व्यक्तिलाई निःशुल्क प्रवेश दिइनेछ । उनले महोत्सव समापन पछि पत्रकार सम्मेलन गरेर आम्दानी खर्च सार्वजनिक गरेर पारदर्शिता कायम गर्ने बताए ।
गुल्मीकै लागि, व्यवसाय चलायमानका लागि, स्थानीय प्रतिभालाई प्राथमिकताका लागि, सस्तोमा समान उपलब्ध गराउनका लागि, पर्यटकीय क्षेत्रको प्रचार प्रसारका लागि, मनोरञ्जनका लागि र समग्रमा आर्थिक गतिविधि चलायमान बनाउन महोत्सवले टेवा पुराउने पत्रकार सम्मेलन कार्यक्रमका प्रमुख अतिथि रेसुङ्गा नगरपालिका वडानम्बर–१ का वडाध्यक्ष रामप्रसाद पन्थीले बताए । महोत्सवमा साँस्कृतिक कार्यक्रम अन्तर्गत स्थानीय देखि राष्ट्रिय स्तरका कलाकारको सहभागिता रहनेछ ।
महोत्सवमा गुल्मीको समग्र कृषि, पर्यटन, स्थानीय संस्कृति र स्थानीय उत्पादन लगायतलाई प्राथमिकता दिइनेछ । स्थानीय स्टल निःशुल्क रख्न पाइनेछ । यसबाट आएको आर्थिक आम्दानी सामाजिक क्षेत्रमा पनि खर्च गर्ने आयोजक संस्थाले जनाएको छ । महोत्सव हुने स्थान नुनथला एभरग्रीन पार्टी प्यालेस अगाडि पर्छ । जहाँ खानीगाउँ छापटोला, क्याम्पसरोड वी.पी. चोक र हस्पिटल लाइन हुँदै पुग्न सकिन्छ ।
यसअघि जिल्ला सदरमुकाम तम्घास स्थित चिदीचौर खेल मैदानमा महोत्सव हुँदै आएको थियो । तर त्यस ठाउँलाई सौन्दर्यकरण गर्न भन्दै महोत्सव गर्न नपाइने भएपछि तम्घासको खानीगाउँ स्थित नुनथला भन्ने स्थान हुने भएको हो ।
महोत्सवमा बिभिन्न औधोगित क्षेत्रबाट उत्पादित सामाग्रीहरु सँगै गुल्मी जिल्लामा बिभिन्न जाती बिशेष रहेका खाना परिकारहरु, बिभिन्न सँस्कृति झल्कीने झाँकीहरु पनि प्रर्दशन गरिने गुल्मी चेम्बर अफ कमर्शका बरिष्ठ उपाध्यक्ष बिरेन्द्र भुसालले बताए ।
जिल्लाको सदरमुकाम तम्घासमा चल्ने महोत्सवबाट गुल्मी जिल्लाको कृषि, घरेलु औधोगिक प्रर्बद्धनसगै पर्यटकीय क्षेत्रहरुको प्रर्बद्धन र प्रचारप्रसार महत्वपुर्ण उदेश्य आयोजकको रहेको छ । महोत्वसमा स्थानीय र राष्ट्रिय स्तरका कलाकारहरुको पनि प्रस्तुति रहने आयोजकले जनाएको छ ।
