शिव सुवेदी (पावर संचार संवाददाता )
४ चैत्र बुटवल । नेपाल प्रहरीको ३१ औं महानिरीक्षक (आईजीपी)मा दीपक थापा नियुक्त भएका छन । केहि वेर अगाडी प्रधानमन्त्रीको सरकारी निवास बालुवाटारमा बसेको मन्त्रिपरिषद बैठकले थापालाई आईजीपीमा नियुक्त गरेको हो ।
प्रहरी अतिरिक्त महानिरीक्षक एआईजी दीपक थापा नेपाल प्रहरीको ३१ औं आईजीपीमा नियक्त भएका हुन् । एआईजीहरू सुदीप गिरी र टेकबहादुर तामाङलाई पछि पार्दै थापा नेपाल प्रहरी प्रमुख बनेका हुन् ।
विद्यमान प्रहरी ऐन कायम रहेमा थापाको कार्यकाल करिब ६ महिनाको हुनेछ । सेवा प्रवेश गरेदेखि एआईजी हुँदा सम्म थापाले २० भन्दा बढी युनिटको नेतृत्व गरिसकेका छन् ।
प्रहरी भित्र उनी नेतृत्व क्षमताको आधारमा सबैभन्दा बढी युनिट कमाण्ड गर्ने अफिसरको रूपमा परिचित छन । एआईजी भएपछि थापाले उपत्यका प्रहरी कार्यालयको प्रमुख, केन्द्रीय अनुसन्धान ब्यूरो (सीआईबी) प्रमुख र प्रहरी प्रधानकार्यालयको प्रशासन विभाग प्रमुख भई कार्यसम्पादन गरेका छन् ।
थापा प्रशासन विभागमा हुँदा कार्यसम्पादनमा उत्कृष्टता हासिल गरेर पुरस्कृत समेत भएका थिए । प्रहरीको ३१ औं आईजीपीको दाबेदारमा रहेका एआईजीहरू दीपक थापा,सुदीप गिरी र टेकबहादुर तामाङ ३ जना नै २०५२ भदौ १९ गते प्रहरी सेवामा प्रवेश गरेका हुन ।
थापा हाल केन्द्रीय अनुसन्धान ब्युरो (सीआईबी) प्रमुख थिए । गिरी राष्ट्रिय प्रहरी प्रशिक्षण प्रतिष्ठान प्रमुख र तामाङ उपत्यका प्रहरी कार्यालय प्रमुखको जिम्मेवारीमा छन ।
