काठमाडौं, अपराध अनुसन्धान कार्यालय टेकुले सामाजिक सञ्जाल मार्फत ठगी गर्ने एक व्यक्तिलाई पक्राउ गरेको छ। पक्राउ पर्ने व्यक्ति २७ वर्षीय नारायणदत्त खकुरेल हुन्, जो धादिङ जिल्लाका स्थायी बासिन्दा हुन् । उनलाई प्रहरीले काभ्रेपलाञ्चोक जिल्ला बाट पक्राउ गरेको हो।
प्रहरीका अनुसार, खकुरेलले वैदेशिक रोजगारीमा रहेका नेपालीहरुको नाम र तस्बिर प्रयोग गरी नक्कली फेसबुक आईडी बनाउने गरेका थिए। उनले ती नक्कली अकाउन्ट मार्फत पीडितका आफन्त, साथीभाइलाई आर्थिक समस्यामा परेको नाटक गर्दै रकम माग्ने गर्थे । उनले पीडितहरूसँग सम्पर्क गर्दा आफू गम्भीर समस्यामा परेको नाटक गर्दै “मेरो एकदमै जरुरी छ, तुरुन्तै QR कोड स्क्यान गरेर पैसापठाइदिनुहोस्” भन्ने सन्देश पठाउने गरेका थिए । यसरी झुक्याएर धेरै व्यक्तिबाट पैसा ठगी गरेको प्रहरीले जनाएको छ।
प्रहरीले अनुसन्धानको क्रममा नारायणदत्त खकुरेललाई काभ्रेपलाञ्चोकको टोखाबाट पक्राउ गरेको हो। पक्राउपछि प्रहरीले उनकोसाथबाट ओप्पो कम्पनीको मोबाइल फोन र पासपोर्ट मोटरसाइकल (ना.४८ प १७९६) बरामद गरेको छ।
हाल सामाजिक सञ्जाल मार्फत यस्ता ठगीका घटनाहरू दिन प्रतिदिन बढिरहेका छन । विशेष गरी विदेशमा रहेका नेपालीहरुको नामदुरुपयोग गर्दै ठगी गर्ने गिरोह सक्रिय रहेको पाइएको छ। प्रहरीले यस्ता ठगीबाट बच्नका लागि सचेत रहन आग्रह गर्दै कसैले पनि अनलाइनबाट रकम पठाउनु अघि राम्ररी प्रमाणित गर्न अनुरोध गरेको छ। यस घटनाबारे थप अनुसन्धान भइरहेको प्रहरीले जनाएको छ।
