वीरगञ्ज भन्सार नाका हुँदै चालु आर्थिक वर्षको ७ महिनाको अवधिमा ४० अर्ब ३४ करोड ५९ लाख ७९ हजार रुपैयाँ बराबरका वस्तु तथा सामान निर्यात भएका छन् ।
देशभर रहेका साना र ठूला २८ भन्सार नाकामध्ये वीरगञ्ज भन्सार नाका हुँदै भएको निर्यातको हिस्सा भने ३१.७२ प्रतिशत रहेको छ । गतआवको सात महिनाको तुलनामा चालु आवको सोही अवधिमा नाकाबाट हुने निर्यात झण्डै दोब्बर भन्दा धेरै बढेको छ । गत आवको सात महिनाको अवधिमा यो नाका हुँदै १७ अर्ब सात करोड ९५ लाख ६० हजार रुपैयाँ बराबरको वस्तु तथा सामान विदेशी मुलुक निर्यात भएको थियो ।
चालु आवमा प्रशोधित सूर्यमुखी र भटमासको तेल निर्यात बढेसँगै समग्रमा निर्यात बढेको वीरगञ्ज भन्सार कार्यालयका सूचना अधिकारी अमित तिवारीले बताए । “गत आवको तुलनामा चालु आवमा निर्यातमा उत्साहजनक ढङ्गले वृद्धि हुँदै आइरहेको उनको भनाइ छ ।
