३० माघ,रुपन्देही–रुपन्देहीको शुद्धोदन गाउँपालिकाले गाउँपालिकामा उत्कृष्ट कार्य प्रदर्शन गर्ने कर्मचारीहरूलाई प्रमाणपत्र र नगद सहित सम्मान गरेको छ ।
शुद्धोदन गाउँपालिकाको अर्धबार्षिक समीक्षा कार्यक्रमको बिच बुधबार गाउँपालिकाको सभाहलमा आयोजित कार्यक्रममा उत्कृष्ट कार्य प्रदर्शन गर्ने कर्मचारीहरूलाई सम्मान गरिएको शुद्धोदन गाँउपालिकाका प्रमुख प्रशासकीय अधिकृत विष्णु बहादुर घर्तिले बताउनुभयो ।
कार्यक्रममा शुद्धोदन गाउँपालिकाका अध्यक्ष विष्णु प्रसाद बस्यालले विकास निर्माणलाई प्रभावकारी बनाउन निर्वाचित जनप्रतिनिधिहरू एकताबद्ध भएर अघि बढ्नुपर्ने बताउदै सम्मानित कर्मचारीलाई शुभकामना व्यक्त गर्नुभयो ।
गाउँपालिकामा उत्कृष्ट कार्य प्रदर्शन गरे वापत सम्मानित हुनेमा इन्जिनियर तर्फ लक्ष्मण खत्री, वडा कार्यालय सहायक तर्फ माया थापा, वडा सचिव तर्फ वडा नम्बर २ का हरि प्रसाद पोखरेल,अधिकृत स्तर तर्फ गुन्जेश्वरी प्रसाद चौधरी,स्वास्थ्य शाखा प्रमुख समीर भण्डारी,कृषि तथा प्राविधिक तर्फ रमेश रेग्मी, स्वास्थ्यकर्मी तर्फ नगिना कुमाल, सहायक स्तर तर्फ प्रेम कुँवर,स्वास्थ्य संस्था तर्फ मधु खत्री,नगर प्रहरी तर्फ दाशु प्रसाद चौधरी, कार्यालय सहयोगी तर्फ गंगा बन्जाडे रहेको प्रमुख प्रशासकीय अधिकृत बिष्णु बहादुर घर्तिले बताउनुभयो ।
शुद्धोदन गाउँपालिकाले हरेक वर्ष नियमित रूपमा कर्मचारीहरूको मूल्यांकन गरी उत्कृष्ट काम गर्ने कर्मचारीलाई पुरस्कृत गर्दै आएको छ । समीक्षा कार्यक्रममा तथा सम्मान कार्यक्रममा गाउँपालिका उपाध्यक्ष शान्ता देवी ज्ञवाली सहित जनप्रतिनिधि, कर्मचारी तथा विभिन्न क्षेत्रका व्यक्तित्वहरूको उपस्थिति रहेको थियो ।
