अनिल नेपाली,
अर्घाखाँची – अर्घाखाँचीको सन्धिखर्क नगरपालिकाले दुई विधेयक पारित गरेको छ । सोमबार सन्धिखर्क नगरपालिकाको सभाहलमा बसेको नगरपालिकाको १७ औं नगरसभाको दोस्रो बैठकले दुई वटा विधेयक पास गरेको हो ।
सन्धिखर्क नगरपालिकाले आर्थिक विधेयक २०८१, विनियोजन विधेयक २०८१ यस अघि विद्यान समितिका संयोजक चुराबहादुर केसीले नगरसभामा पेस गरेको र सो विधेयक १७ औं नगरसभाको दोस्रो बैठकमा नगरपालिकाका उपप्रमुख मिश्रा आचार्यले निर्णयार्थ पेसगरेपछि दुई विधेयक सभाले सर्वसम्मत पास गरेको सन्धिखर्क नगरपालिकाका नगरप्रमुख कृष्णप्रसाद श्रेष्ठले जानकारी दिए ।
नगरपालिका नगरप्रमुख कृष्णप्रसाद श्रेष्ठले अन्य बजेट संशोधन तथा योजनाहरु हेरफेर गर्न पनि सभामा प्रस्ताव निर्णयर्थ प्रस्तुत गरेका थिए । पुस १४ गते सम्पन्न पहिलो बैठकमा विधायन समितिका संयोजक केसीले नगरसभामा यी दुई वटा विधेयक नगरसभामा प्रस्तुत गरेका थिए ।
सन्धिखर्क नगरपालिकाले बजार व्यवस्थापन तथा अनुगमन विधेयक २०८१ मा सभा सदस्य सदस्यहरुले नगरपालिका भित्र संचालन गरिने मेला, महोत्सव तथा नगरपालिकालाई दिनुपर्ने कर आय अग्रिम नगरपालिकाले लिनुपर्ने सुझाव दिएका थिए ।उक्त विधेयक सुझाव सहित सर्वसम्मत पास भएको थियो ।
त्यस्तै नगरसभामा प्रस्तुत भएको सन्धिखर्क नगरपालिकाको स्थानीय विभिन्न विधेयकहरुमा नगर सभा सदस्यहरुले महत्त्वपूर्ण भनाइ सुझाब सभामा राखेका थिए । नगरसभामा बजारको फोहोरमैला व्यावस्थापन गर्न डम्पिङ सानो भएको बताएका थिए । उनीहरुले बजारमा निजी तथा सार्वजनिक जग्गामा फोहोर फाल्ने भएकाले यहाँको वातावरण प्रदूषित भएकोमा त्यसको ध्यानाकर्षण गराएका थिए ।
सभामा नगरपालिकाका प्रमुख कृष्णप्रसाद श्रेष्ठले नगरपालिकाभित्र भइरहेको विकास निर्माण भावी योजना बजेटका कारण समस्यामा परेका योजनाहरुलाई अब आवश्यकता अनुसार बजेट विनियोजन गरी विकास निर्माणलाई तिब्रता दिने बताएका थिए । उनले जनताको नजिकको सरकार स्थानीय सरकारले राम्रोसँग काम गरेको महसुस सेवाग्राहीलाई गराउने प्रतिबद्धता व्यक्त गरेका थिए ।
नगरसभामा नगरउपप्रमुख आचार्यले महिलाहरुको हक अधिकारका लागि विशेषयोजना ल्याउने गरी नगरसभामा भनाइ राखेकी थिइन् । उनले नगरमा आइ परेका समस्या न्यायिक समिति मार्फत समाधान गर्दै आएको समेत बताइन् ।
’नगरसभामा प्रमुख प्रशासकीय अधिकृत खिमानन्द भुसालले नगरले पारित गरेको विधेयक, कानुन अनुसार कार्यान्वयन गराउने बताए । चालु आर्थिक बर्षमा अहिलेसम्म नगरको करिब ६० प्रतिशत काम सम्पन्न भएको प्रमुख प्रशासकीय अधिकृत भुसालले नगरसभामा जानकारी दिए ।
