२७ माघ, बुटवल – तिनाउ टिप्पर व्यवसायी समिति तिनाउ,पाल्पाको आयोजना र नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवल तथा यातायात मजदुर एवं व्यवसायी भलाई कोष, बुटवलको सहयोगमा टिप्पर चालकहरुलाई ट्राफिक नियम सचेतना सम्बन्धी कार्यक्रम सम्पन्न गरिएको छ ।
माघ २७ गते आइतवार ( आज) बिहान ८:३० देखि १० बजे सम्म रुपन्देहीको बुटवल उपमहानगरपालिका ३ चिडियाखोला स्थित सिद्धार्थ राजमार्ग अन्तर्गत बुटवल–पाल्पा सडक खण्डमा उक्त सचेतना कार्यक्रम गरिएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलका प्रमुख प्रहरी उपरिक्षक (एसपी) श्याम बहादुर खत्रीले बताउनुभयो ।
पटक पटक गरी ६ पटकमा ९३ जना चालकहरुलाई नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलमा कार्यरत प्रहरी नायव निरीक्षक रन बहादुर बि.सी.को कमाण्डमा खटिएका ट्राफिक प्रहरी कर्मचारीले सचेतना प्रशिक्षण प्रदान गरेको ट्राफिक प्रहरी उपरिक्षक खत्रीले बताउनुभयो ।
पछिल्लो समय सडक दुर्घटना न्युनिकरण तथा यतायात व्यवस्थापनको निम्ति नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलले विभिन्न कार्यक्रम तथा अभियानहरु संचालन गर्दै आइरहेको छ । ट्राफिक प्रहरीले स्वरुप तथा सिट परिवर्तन गरेका सफारी तथा मोटरसाइकलको नियन्त्रणमा बिशेष अभियान समेत संचालन गर्दै आइरहेको छ ।
