१८ माघ बुटवल । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलले सवारी साधनको सिटको स्वरुप परिवर्तन तथा सिट थप गरी संचालन गर्ने, सवारी साधनको स्वरुप परिवर्तन गर्ने लगायतका कार्यहरुको नियन्त्रणको लागी सक्रिय रुपमा अभियान चलाएको छ ।
पहिले देखि नै यो अभियान र कार्यलाइ निरन्तरता दिएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलले यही माघ १६ गते कार्यालय प्रमुख प्रहरी उपरीक्षक श्याम बहादुर खत्रीको कमान्डमा खटिएको सवारी चेक जाँच टोलिले बुटवल बसपार्क देखि बिभिन्न जिल्लाहरुको लागि छुट्ने ८ वटा मिनी माईक्रो बस तथा ई.भि. भ्यानहरु नियन्त्रणमा लिएको थियो ।
सवारी चेकजाँच गर्दा यातायात व्यवस्था ऐन २०४९ को दफा ३९ को १ बमोजिम सिटको स्वरुप तथा सिट थप गरी संचालन गरिएका सवारी साधनहरु कारवाहीको प्रक्रियामा अगाडी बढाइएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख (प्रहरी उपरिक्षक) श्याम बहादुर खत्रीले बताउनुभयो ।
त्यस्तै प्रहरीले बुटवल बजार क्षेत्र भित्र संचालन भएका सवारीको स्वरुप परिवर्तन गरी अस्वभाविक ध्वनी निकाल्ने ४ वटा बुलेट मोटरसाइकल समेत नियन्त्रणमा लिइ आवस्यक कारवाहीको लागी अगाडी बढाइएको प्रहरी उपरिक्षक खत्रीले बताउनुभयो । प्रहरीले यो नियन्त्रण र कारवाही अभियानलाइ निरन्तर अगाडी बढाउने बताएको छ ।
