गुल्मी – समाजमा विभिन्न अपराधजन्य घटनाहरु बढ्दै गएकोले गुल्मीको मालिका गाउँपालिकाले दैनिक अढाई घण्टा मात्रै मदिरा बिक्री वितरण गर्न पाइने निर्णय गरेको छ । पछिल्लो समय पालिकामा मदिरा सेवन बाट मानिसहरुको अकालमा मृत्यु भएपछि पालिकालेम दिरा बिक्री वितरणमा कडाइ गरेको हो ।
दैनिक साँझ ५ः३० देखि ८ बजेसम्म मात्रै मदिरा बिक्री गर्न पाइने गाउँपालिकाले बताएको छ । यदि यो नियमभन्दा विपरित रहेर तोकिएको समयभन्दा अन्य समयमा मदिरा बिक्री वितरण गरेमा पहिलो पटकमा पाँच हजार जरिवाना गरिने पालिकाले निर्णय गरेको छ । उक्त समयमा पनि नाबालक, दीर्घरोगी र महिलाहरुलाई बिक्री गर्न पाइने छैन ।
अनुगमनको लागि पालिकाले प्रहरीलाई खटाउने र जरिवानाबाट प्राप्त भएको रकमको २५ प्रतिशत रकम प्रहरीको सवारी साधन मर्मतमा खर्च हुनेछ । साथै गाउँपालिकाले प्लास्टिक बोतमा बिक्री गर्दै आएको लोकल मदिरा पूर्ण रुपमा बिक्री वितरणमा रोक लगाउने पनि निर्णय गरेको छ । यस्तो मदिरा हटाउन पालिकाले व्यवसायिहरुलाई सात दिनको समय दिएको छ ।
