काठमाडौँ । गुल्मेली गायक रामचन्द्र चन्दको विशेष साङ्गीतिक साँझ आयोजना हुन अब ३ दिन बाँकी रहेको छ । ग्रीन सिटी हस्पिटलको प्रायोजन तथा गुल्मी कलाकार समाजको आयोजनामा यही असोज १४ गते साँझ राष्ट्रिय नाचघर जमलमा विजया दशमीको शुभकामना सहितको साङ्गीतिक साँझको आयोजना गरिन लागिएको हो ।
‘रोग बाँड्न सकिन्न, दुख बाँड्न सकिन्छ’भन्ने नारासहित गायक रामचन्द्र चन्दको उपचार सहयोगार्थ साङ्गीतिक साँझको आयोजना गरिएको बिहीबार आयोजित पत्रकार सम्मेलनमा गुल्मी कलाकार समाजका महासचिव कमल जि सी ले बताए ।
महासचिव जि सी ले एउटा कलाकारको उपचारको लागि अर्को कलाकारले गर्ने सहयोग नै गुल्मी कलाकार समाजले गर्न लागेको बताउँदै,साङ्गीतिक साँझ सफल पार्नका लागि व्यक्ति तथा संस्थागत सहयोग सङ्कलनलाई तीव्रता दिइए पनि साङ्गतिक साँझमा प्रवेश निःशुल्क गरिएको जानकारी दिए ।
कोरोना कालमा खुट्टामा समस्या देखिएपछि केही वर्षदेखि उनी स्टेज कार्यक्रममा उपस्थित हुन पाएका छैनन् । एउटा अप्रेसन गर्नु पर्ने र त्यसपछि एक वर्ष रेष्टमा बस्नुपर्ने भएकाले पनि साङ्गीतिक साँझ मार्फत सहयोगको अपिल गरिएको गाएक चन्दले बताए
गुल्मीको मदाने गाउँपालिका १ अग्लुङमा जन्मिएर बिगत लामो समय देखि चन्द लोक दोहोरी क्षेत्रमा सक्रिय छन् । एक सय भन्दा बढी गीतमा स्वर दिएका उनले ‘माया सारै छ’ बाट गायनमा डेब्यू गरेका थिए । त्यस यता उनले ‘गुल्मीको शान,भिरमा रुँदै छु , तीन फुर्केडोरी,अब देखि एक्लै हुन्न म,खाली सिउँदो भरम नभन,मैना,धोको फेरम्ला,मुटु गाँठो,सूर्यमुखी फुल,भुल्दै भुल्दै जानु,चरी रुखमा,योमायामा रुन नपरोस,लगायतका गीतलाई दर्शक श्रोताले मन पराएका छन् ।
साङ्गीतिक साँझमा चन्दले आफ्ना लोकप्रिय गीतहरू लाइभ सुनाउने र उनलाइ राष्ट्रिय स्तरका गायिकाहरुले साथ दिने गुल्मी कलाकार समाजका प्रवक्ता तुलसिंह रनपछाईले जानकारी दिए । पत्रकार सम्मेलनमा बरिष्ठ लोक गायक बम बहादुर कार्की, वैकुण्ठ महत, मन्जु पौडेल, हुमगैरे लगायत कलाकर्मीको समेत उपस्थिति रहेको थियो ।
