दिपक अर्याल
८ असोज, बुटवल– गुल्मी मालिका गाउँपालिका ४ अर्खावाङ्ग रुपन्देही सम्पर्क समाजले आफ्नो ७ औँ बार्षिकोत्सवको अवसरमा रक्तदान कार्यक्रम सम्पन्न गरेको छ ।
कार्यक्रममा बोल्दै सम्पर्क समाजका अध्यक्ष विरेन्द्र अर्यालले रगत र रक्ततत्वको अभाव हुन नदिने उद्धेश्यका साथ रक्तदान कार्यक्रम आयोजना गरिएको बताए । साथै सम्पर्क समाज स्थापना कालदेखि नै सामाजिक क्षेत्रमा क्रियाशिल रहेको बताउदै अध्यक्ष अर्यालले आगामी दिनमा आफुहरुले सक्दो सामाजिक कार्य गर्ने बताएका थिए ।
रक्तदान कार्यक्रममा सम्पर्क समाजका सल्लाहाकार उमेश रेग्मी, राजु अर्याल लगायत अन्य कार्य समिति सदस्यहरुको सहभागिता रहेको थियो । सम्पर्क समाजले गत वर्ष पनि स्थापना दिवसको अवसरमा रक्तदान गरेको थियो । रक्तदान कार्यक्रममा सम्पर्क समाजका सदस्य सहित ५२ जनाले रक्तदान गरेका थिए ।
रक्तदान कार्यक्रम सम्पर्क समाजका अध्यक्ष विरेन्द्र अर्यालको अध्यक्षता, नेपाल स्वयंसेवी रक्तदाता समाजका केन्द्रिय महासचिव कृष्ण चौहानको प्रमुख आथित्यता, उपाध्यक्ष प्रेमबहादुर अर्यालको स्वागत मन्तव्य र सचिव टेकराज रेग्मीको संचालनमा सम्पन्न भएको थियो ।
२०७० सालमा स्थापना भएको सम्पर्क समाजले अर्खवाङ्गलाई एम्बुलेन्स प्रदान गर्नुका साथै आर्थिक अवस्था कमजोर भएका समाजका सदस्यहरुलाई आर्थिक सहयोग गर्ने गरेको छ । सम्पर्क समाजमा अहिले ३७ जना आजीवन सदस्य, १ जना मानार्थ सदस्य र १०४ जना साधारण सदस्य रहेका छन् ।
