बुटवल – सिद्धार्थ राजमार्ग अन्तर्गत रुपन्देही र पाल्पाको सीमा क्षेत्रमा रहेको राष्ट्रिय गौरवको आयोजना सिद्धबाबा सुरुङमार्ग आधाभन्दा बढी भाग खनिएको छ । सुरुङ अहिलेसम्म ५४५ मिटर खनिएको हो । कुल १ हजार १२६ मिटर लामो सुरुङमा दुवैतर्फ गरी ५४५ मिटर खनिएको आयोजनाले जनाएको छ ।
नेपाल सरकारले २०७८ साल फागुनमा चिनियाँ कम्पनी चाइना स्टेट कन्स्ट्रक्सन इन्जिनियरिङ कर्पोरेसन (सीएससीईसी)लाई ७ अर्ब ३४करोड २१ लाख रुपैयाँमा उक्त सुरुङमार्ग बनाउने ठेक्का दिएको थियो । ठेक्का सम्झौताअनुसार सुरुङमार्ग निर्माणपछि पनि सोही कम्पनीले पाँच वर्षसम्म मर्मतको काम गर्नुपर्नेछ ।
आयोजनाका अनुसार अहिलेसम्म उत्तरतर्फ २३७ र दक्षिणतर्फ ३०७ मिटर खनिएको छ । सुरुङ मार्गका तीनवटा बाइपास रहेका छन् । जसमा पहिलो बाइपास १३७, दोस्रो ११७ र तेस्रो १२३ मिटर खनिएको छ ।
बर्षा सङ्गै हिउँदमा समेत पहिरो झर्ने यस ठाउँलाई सुरक्षित बनाइ ठुलो मात्रामा हुने धन जनको क्षतिलाई रोक्न गत २०८० माघ ४ गतेसुरुङ खन्ने काम औपचारिक रुपमा शुरू गरिएको थियो । मुख्य सुरुङ आउँदो डिसेम्बर सम्म छेड्ने लक्ष्य रहेको आयोजना कम्पनीले बताएको छ ।
सिद्धार्थ राजमार्गको दोभानदेखि सिद्धबाबा सम्म झण्डै ४ किलोमिटर सडक क्षेत्र उच्च पहिरोको जोखिममा छ । यहाँ बर्षायाममा पहिरो झरिरहने समस्या छ । भौगोलिक बनावटको जटिलता सङ्गै भीर र अग्लो चट्टानी क्षेत्र भएकाले हिउँदमा समेत सुख्खा पहिरोको उत्तिकै जोखिम रहने गर्दछ । यो मार्ग हुँदै उत्तरका धेरै जिल्लाहरुमा आवतजावत हुने गर्दछ ।
