बुटवल, जेठ ३० — नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलले चालु आर्थिक वर्ष २०८२/०८३मा लुम्बिनी प्रदेशभर ट्राफिक नियम उल्लंघन गर्ने सवारी साधनमाथि व्यापक कारबाही गरेको जनाएको छ । कार्यालयले बुधवार दुर्घटना, ट्राफिक कारबाही र राजस्व संकलन बारे पत्रकार सम्मेलन मार्फत जानकारी गराएको हो ।
कार्यालयका अनुसार चालु आर्थिक वर्षको हालसम्म ओभरलोडमा सञ्चालन भएका २४ हजार २ सय ६६ सवारी साधनबाट ४ करोड १८ लाख २६ हजार ५०० रुपैयाँ जरिवाना असुल गरिएको छ भने ओभरलोड बोकेका १ हजार ४ सय ४९ सवारी साधनलाई यातायात व्यवस्था कार्यालय पठाइएको र ती सवारी साधनबाट १ करोड ४३ लाख ७० हजार ८ सय रुपैयाँ जरिवाना गरिएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख (प्रहरी उपरिक्षक) मित्र बन्धु शर्माले बताउनुभयो ।
त्यस्तै कार्यालयका अनुसार स्वरुप परिवर्तन गरी ठूलो आवाज निकाल्ने ५ सय ७२ वटा मोटरसाइकललाई नियन्त्रणमा लिई थपकारबाहीका लागि यातायात व्यवस्था कार्यालय पठाइएकोमा यसबाट मात्रै ४७ लाख ५८ हजार रुपैयाँ राजस्व संकलन भएको बताइएको छ ।
यो अवधिमा लुम्बिनी प्रदेशभित्र लागु पदार्थ सेवन ( लापसे ) गरेर सवारी चलाउने ३९ जना चालक र मादक पदार्थ सेवन (मापसे) गरेरसवारी चलाउने ४ हजार ७ सय ७५ चालकलाई कारबाही गरिएको ट्राफिक प्रहरीले जनाएको छ ।
यसैगरी, आफुखुसी सिट मुढा राखेका ५ सय ८३ सवारी साधनलाई कारबाही गरिएको छ भने विभिन्न जिल्लामा सार्वजनिक तथा निजीसवारीमा जडान गरिएका चालकको दृश्य अवरोध गर्ने अव्यवस्थित फूल, झिलिमिली, माला लगायत सामग्री हटाइएको छ । ट्राफिक प्रहरीका अनुसार ७ सय २३ सवारी साधनबाट २०० थान ‘ग्लेयर कजिङ लाइट्स’ (फोकस, फग तथा शो लाइट) र ६८५ सवारी साधनबाट १ हजार १ सय ७४ थान झिकिएको छ। साथै नियम विपरीत जडान गरिएका ८२ वटा हुड (छत) हटाइएको छ ।
त्यसै गरि यो अवधिमा प्रयोजन विपरीत रातो प्लेट प्रयोग गरी यात्रु बोकेको पाइए पछि ८ सय ६७ सवारी साधनलाई कारबाहीका लागि यातायात व्यवस्था कार्यालय पठाइएको छ भने १ हजार ५ वटा नम्बर प्लेट सुधार गरिएको कार्यालयले जनाएको छ ।
लामो समयसम्म नवीकरण नगरी सञ्चालन गरिएका १७० सवारी साधनलाई नियन्त्रणमा लिई यातायात व्यवस्था कार्यालयपठाइएकोमा यसबाट १५ लाख रुपैयाँभन्दा बढी राजस्व संकलन भएको ट्राफिक प्रहरीले जनाएको छ । यातायात व्यवस्था कार्यालयकाप्राविधिक र ट्राफिक प्रहरीको संयुक्त टोलीले सवारी साधनको मेकानिकल तथा प्राविधिक परीक्षण गर्दा ६२ वटा सवारी साधन नियन्त्रणमा लिइएको समेत ट्राफिक प्रहरी कार्यालयले जनाएको छ ।
दुर्घटना र कारबाहीको तथ्यांक
कार्यालयले सार्वजनिक गरेको तथ्यांकअनुसार चालु आर्थिक वर्ष २०८२/०८३ को बैशाख मसान्तसम्म लुम्बिनी प्रदेशमा ४ हजार ४ सय ८८ वटा सवारी दुर्घटना भएका छन । दुर्घटनामा परी चालु आर्थिक वर्षमा प्रदेशभर ४ सय ९३ जनाको मृत्यु भएको छ भने ७ हजार ५ सय८ जना घाइते भएका छन् । अघिल्लो वर्ष सोही अवधिमा ४ सय २४ जनाको मृत्यु र ४ हजार ५ सय ५४ जना घाइते भएका थिए । त्यस्तै, चालु आर्थिक वर्षमा ९४ हजार ८ सय ४१ ट्राफिक कारबाही गरिएको कार्यालयले जनाएको छ।
चालकको लापरवाही मुख्य कारण
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार दुर्घटनाको मुख्य कारण तीव्र गति रहेको छ । आज पत्रकार सम्मेलनमा सार्वजनिक विवरण अनुसार तीव्र गतिका कारण २ हजार ९ सय ५१ दुर्घटना भएका छन् भने मापसेका कारण ५ सय ६६ दुर्घटना भएका छन ।
त्यस्तै चालकको असक्षमताका कारण ४ सय ९०, अन्य लापरवाहीका कारण १ सय २ दुर्घटना भएका छन् । मोबाइल फोन प्रयोग, निद्रातथा थकान, अनावश्यक ओभरटेक र लेन अनुशासन उल्लंघनका कारण समेत दुर्घटना भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख प्रहरी उपरिक्षक मित्र बन्धु शर्माले बताउनुभयो ।
विभिन्न शीर्षकमा ट्राफिक कारबाही र जरिमाना
चालु आर्थिक वर्ष २०८२/०८३ बैशाख मसान्तसम्म तीव्र गतिमा सवारी चलाउने १ हजार ८ सय ९९ चालकलाई कारबाही गरी १० लाख १७ हजार रुपैयाँ राजस्व संकलन गरिएको ट्राफिक प्रहरीले जनाएको छ । त्यस्तै मापसे गरेर सवारी चलाउने ४ हजार ७ सय ७५ चालकबाट २५ लाख ६४ हजार रुपैयाँ राजस्व संकलन गरिएको छ भने गलत स्थानमा पार्किङ गर्ने ३ हजार ७ सय २३ सवारीबाट २६ लाख ५२ हजार ५०० रुपैयाँ जरिवाना उठाइएको छ ।
त्यस्तै रातो बत्ती/इशारा उल्लंघन गर्ने ४ हजार २ सय ६२ चालकबाट २२ लाख २२ हजार रुपैयाँ, लेन अनुशासन उल्लंघन गर्ने १ हजार २ सय ६१ चालकबाट ६ लाख ७६ हजार रुपैयाँ तथा चालकको असक्षमता सम्बन्धी ६ हजार ५ सय ६९ कारबाही बाट १ करोड ३१ लाख ३८ हजार रुपैयाँ राजस्व संकलन गरिएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलले जनाएको छ । यो अवधिमा लुम्बिनी प्रदेश भित्र लागु पदार्थ सेवन ( लापसे ) गरेर सवारी चलाउने ३९ जना चालकलाई आवश्यक मुद्धा चलाइएको कार्यालयले बताइएको छ ।
