काठमाडौंको कलंकी स्थित इडिफाई इन्टरनेसनल स्कुलको कम्पाउण्डमै सोमबार दिउँसो भयानक दुर्घटना भएको छ । दुर्घटनामा एक छात्राको ज्यान गएको छ भने अन्य सात जना घाइते भएका छन ।
दिउँसो १२:५० बजे विद्यालय छुट्ने समयमा इभी माइक्रो भ्यानले विद्यालयको मुख्य गेटको पिल्लरमा ठोक्किँदा दुर्घटना भएको हो । दुर्घटनामा सर्लाही स्थायी घर भई कुलेश्वर बस्दै आएकी ९ वर्षीया सोनाक्षी यादव गम्भीर घाइते भइ सहिद मेमोरियल अस्पतालमा उपचारका क्रममा निधन भएको जिल्ला प्रहरी परिसर, काठमाडौंले जनाएको छ । दुर्घटनामा अन्य सात जना घाइते भएका छन्।
प्रहरीका अनुसार घटनाको बेला भ्यानमा चालक मात्र सवार थिए । प्रधानाध्यापक सहित विद्यार्थीहरू गेट छेउमै रहेका बेला अनियन्त्रित भ्यानले ठक्कर दिएको हो ।
प्रारम्भिक अनुसन्धान अनुसार भ्यान चालकले ४ दिन अगाडी ल्याइएको इभी गाडी चलाउने पर्याप्त अनुभव नपाएको र गाडी सञ्चालनमा अभ्यस्त नभएकै कारण दुर्घटना भएको प्रहरीको भनाइ छ । घटनापछि प्रहरीले भ्यान चालकलाई नियन्त्रणमा लिएर थप अनुसन्धान अघि बढाएको छ।
