२५ जेठ, दाङ । दाङको तुलसीपुर उपमहानगरपालिका–१३ बखरिया स्थित तुलसीपुर–अमलिया सडकखण्डमा यात्रुवाहक बस र विद्यालयको बस एकआपसमा ठोक्किँदा भएको दुर्घटनामा परी दुई जनाको मृत्यु भएको छ भने २५ जना घाइते भएका छन ।
आज बिहान करिब ११ बजेतिर गोल्टाकुरी बाट तुलसीपुरतर्फ आउँदै गरेको ना ४ ख ४००९ नम्बरको यात्रुवाहक बस र तुलसीपुरबाट बखरियातर्फ गई विद्यार्थीलाई झारेर फर्किंदै गरेको रा १ क ८७० नम्बरको विद्यालय बस आपसमा ठोक्किँदा दुर्घटना भएको हो ।
दुर्घटनामा गम्भीर घाइते भएका दंगीशरण गाउँपालिका–२ की ४२ वर्षीया शान्ता खड्का चौधरी र तुलसीपुर उपमहानगरपालिका–४ का ६० वर्षीय नारायण भण्डारीको उपचारको क्रममा राप्ती प्रादेशिक अस्पतालमा मृत्यु भएको इलाका प्रहरी कार्यालय तुलसीपुरले जानकारी दिएकोछ ।
दुर्घटनामा अन्य २५ जना यात्रु तथा विद्यालय बसमा सवार व्यक्तिहरू घाइते भएका छन । उनीहरूको थप विवरण संकलनको काम भइरहेको प्रहरीले जनाएको छ । दुर्घटनाको कारणबारे अनुसन्धान जारी छ।
