अर्घाखाँचीमा १२ वर्षीया बालिकाको विवाह गराएको आरोपमा दुई जना पक्राउ परेका छन ।
बालिकालाइ ललाई फकाई विवाह गराइदिने भूमिकास्थान नगरपालिका–९ की सकुन्तला सारु र विवाह गर्ने सन्धिखर्क नगरपालिका–८ का मुमाराम बिक लाई पक्राउ गरिएको जिल्ला प्रहरी कार्यालयका प्रमुख (डीएसपी) चक्र बहादुर मल्लले जानकारी दिए ।
सकुन्तलाले काम लगाइदिने भन्दै १२ वर्षीय बालिकालाई घरमा बोलाएर मुमारामको जिम्मा लगाएको र त्यसपछि मुमारामले बालिकालाई सिन्दुर पहिराएर घरमा भित्राएको भन्दै बालिकाको अंकलले जाहेरी दिएका थिए ।
बालविवाह सम्बन्धी जाहेरी परेपछि प्रहरीले घरमा छापा मारेर मुमारामलाई नियन्त्रणमा लिएको हो । अदालतबाट म्याद थप गरी घटनाको अनुसन्धान जारी रहेको जिल्ला प्रहरी कार्यालय अर्घाखाँचीका सूचना अधिकारी विष्णुप्रसाद पौडेलले बताए ।
