भारतमा उत्पादन भएका १२ प्रतिशत मसलामा स्वास्थ्यलाई प्रतिकुल असर पार्ने किटनाशकको मात्रा भएको परिक्षणमा पुष्टि भएको छ । मसलामा मिसाइएको उक्त किटनाशकले क्यान्सर जस्तो जोखिमलाई बढाउने काम गर्छ ।
भारतिय मसला विश्वका धेरै देशहरुमा निर्यात हुने गरेको छ । विश्वभर चर्चित बटुलेको भए पनि उत्पादन भएका १२ प्रतिशत मसला गुणस्तर मापदण्ड अनुसार खान योग्य नभएको प्रतिवेदन सार्वजनिक भएको छ ।
भारतको फुड एण्ड स्ट्यान्डर्ड अथ्रुरिटी अफ इन्डिया ( FASAAI )ले देशमा बिक्री भइरहेको कुल ४०५४ ओटा नमुना परिक्षण गरेको थियो । जसमा ४७४ ओटा मसला FASAAI मापदण्ड अनुसार खान अयोग्य रहेको जनाइएको छ । FASAAI ले मे देखि जुलाईसम्म यि मसलाको परिक्षण गरेको थियो । सिङ्गापुर ,हङकङ ,नेपाल लगायतमा देशहरुले भारतिय मसलाको गुणस्तरमाथि प्रश्न उडाउँदै भारतिय मसला माथि प्रतिबन्ध लगाएपछि भारतमा मसलाको परिक्षण सुरु भएको थियो ।
नेपाल लगायतका विभिन्न देशहरुले एभरेस्ट र एम.डि. एच मसलामा प्रतिबन्ध लगाएको थियो । गएको जेठमा खाद्य तथा गुण नियन्त्रण विभागले नेपालमा दुई वटा व्रान्डको बन्द प्याकेट मसलामा किटनाशक इथलाइन अक्साइड भेटिएपछि एभरेस्ट र एम. डि. एच मसला उपभोग ,विक्री वितरण तथा आयातमा रोक लगाएको थियो ।
