अनिल खत्री
१२ साउन, गुल्मी । गुल्मी जिल्लाको चन्द्रकोट गाउँपालिकामा निर्माण सम्पन्न भएको आधारभूत अस्पताल एक वर्ष बितिसक्दा समेत अझै सम्म प्रयोगमा ल्याइएको छैन् । करोडौं रुपैयाँ खर्चेर निर्माण गरिएको आधारभूत अस्पताल भवन सञ्चालनमा नआउदा नागरिकले वषौंदेखि भोग्दै आएको समस्या जहाको त्यहिँ छ ।
गाउँपालिकाको वडानम्बर–४ शान्तिपुरमा निर्माण गरिएको १५ शैयाको अस्पताल भवन हालसम्म प्रयोगविहीन अवस्थामा रहँदै आएको छ । २०७८ साल असार २५ गते अस्पताल भवन निर्माणका लागि सम्झौता भएको थियो ।
भवनको तोकिएको समयमै २०८१ साल असारमा निर्माण कार्य सम्पन्न गरिएको थियो । निर्माणको जिम्मा लिएको तुलसीदत्त अर्जुन बिल्डर्स प्रालि, तम्घासले १२ करोड ७२ लाख रुपैयाँको लागतमा भवन निर्माण गरेको हो ।
निर्माण सम्पन्न भएको एक वर्ष पुगिसक्दा पनि अस्पताल सञ्चालन नहुँदा स्थानीय बासिन्दाहरू असन्तुष्ट छन् । स्थानीका अनुसार सामान्य देखि आकस्मिक सेवा लिन पनि टाढासम्म धाउनुपर्ने बाध्यता छ ।
सेवा सञ्चालन नहुँदा करोडौं रुपैयाँ खर्चेर बनाइएको अस्पताल भवन खेर जाने अवस्थामा पुग्न थालेको गुल्मी उद्योग वाणिज्य संघशान्तिपुर शाखा अध्यक्ष तेजेन्द्र थापाले बताए । सरकारले गाउँमा अस्पताल बनाउने भनेर खुसी बनाएपछि समयमै अस्पताल सञ्चालनमा नआउदा विभिन्न खाले प्रश्न जन्माएको उनको भनाइ छ ।
स्वास्थ्य सेवा जनताको आधारभूत अधिकार भएपनि यसमा सरकारले ढिलाइ गर्नु गम्भीर लापरवाही भएको थापाको तर्क छ ।अस्पताल सञ्चालनमा नआउदा नागरिकले सामान्य बाहेक अन्य स्वास्थ्य सेवा लिन जिल्ला सदरमुकाम तम्घास र पाल्पा, बुटवल जानुपर्ने बाध्यता रहेको छ ।
गाउँपालिकामा निर्माण भएका अत्यधुनिक अस्पताल भवनहरुमा तोकिए अनुसारका सेवा सुबिधा सहितका डक्टरहरु उपलब्ध नभए ठूला भवनले कुनै अर्थ राख्ने छैन् । अहिले पनि दुर्गम गाउँवस्तीमा बिशेषज्ञ डक्टरहरु जान र बस्न नमान्ने समस्या रहेको छ ।
गाउँपालिकाले केन्द्र र प्रदेश सरकारसँग समन्वय गरेर सञ्चालन गर्ने तयारी गरिरहेको चन्द्रकोट गाउँपालिकाका सूचना अधिकारी शिवप्रसाद ज्ञवालीले बताए । कार्यपालिकाबाट अस्पताल सञ्चालनका लागि विभिन्न खाले प्रक्रिया अगाडी बढेको ज्ञवालीको तर्क छ ।
पछिल्लो समय संघिए सरकारले आधारभूत अस्पताललाई पालिका चलाउने भनेकाले डाक्टर लगायत स्वास्थ्यकर्मीहरु राख्नपालिकासँग आन्तरिक श्रोत नहुँदा राख्न समस्या छ । भवनमा लिफ्ट सिस्टकसँगै अत्यधुनिक खालको रहेको छ ।
नेपाल सरकारले २०७७ साल मंसिर १५ देशभर रहेका स्थानीय तहमा अस्पताल निर्माण गर्न एकै पटक शिलान्यस गरेको थियो ।जिल्लाको गुल्मीदबार गाउँपालिको गएको वैशाखदेखि अस्पताल सञ्चालनमा आएको छ ।
पालिकाले एकजना डक्टर सहित नर्स, स्वास्थ्य कर्मीहरु राखेर सञ्चालनमा ल्याएको हो । तर जिल्लाका अन्य स्थानीय तहमा भने अस्पताल निर्माणको काम निकै सुस्त गतिमा भइरहेको छ ।
जिल्लाका अन्य पालिकामा १५ शैयाका र जिल्ला सदरमुकाम तम्घासमा पनि ५५ शैयाको अत्यधुनिक भवन निर्माणको काम भइरहेको छ ।
