९ साउन बुटवल । अन्नपुर्ण बहुउदेश्यीय सहकारी संस्थाले रक्तदान कार्यक्रम आयोजना गर्ने भएको छ । बुटवल ७ दिपनगरमा रहेको उक्त संस्थाले रक्तदान कार्यक्रम आयोजना गर्ने भएको हो ।
संस्थाले आफ्नो संस्थाको २५ औँ स्थापना दिवस (रजत जयन्ती) को अवसर पारेर यही श्रावण ११ गते आइतवारका दिन रक्तदान कार्यक्रम गर्न लागेको संस्थाका कोषाध्यक्ष विजय ज्ञवालीले बताए ।
२५ औँ रजत जयन्तीको अवसरमा रक्तदान सहित स्मारिका बिमोचन, संस्था स्थापना कालदेखि योगदान दिएका संस्थापनहरुलाई सम्मान, सहकारीका पुराना,विशिष्ट र जेष्ठ नागरिक सम्मान, उत्कृष्ट विधार्थी सम्मान, असल ऋणी सम्मान लगायतका कार्यक्रम हुने कोषाध्यक्ष ज्ञवालीले जानकारी दिए ।
श्रावण ११ गते आइतवार बुटवलको मिलनचोकमा रहेको दियालो फुडल्याण्डमा बिहान ८ बजे देखि रक्तदान सुरु गरिने र दिनभर रजत जयन्तीको अवसरमा अन्य कार्यक्रम गरिने आयोजकले बताएको छ ।
२०५७ सालमा स्थापना भएको उक्त सहकारीमा हाल ६६१ जना सेयर सदस्य रहेका छन । सहकारीले विगतका वर्षहरुमा रक्तदान, निशुल्क स्वास्थ्य शिविर आयोजना, छात्रवृति वितरण, बृक्षारोपण लगायत धेरै सामाजिक कार्यहरु गर्दै आइरहेको छ ।
