अनिल खत्री
१२ असार, गुल्मी । गुल्मी जिल्लाको प्रमुख धार्मिक तथा पर्यटकीय क्षेत्र रेसुङ्गाको धार्मिक, ऐतिहासिक र सांस्कृतिक महत्त्व उजागर गर्ने उद्देश्यले तयार गरिएको भजन गीति संग्रह ‘रेसुङ्गा जाऔं’ सार्वजनिक भएको छ ।
स्थानीय स्रष्टा हुमकला रानाले लेखेको यस भजनमा रेसुङ्गा क्षेत्रमा रहेका धार्मिक तीर्थस्थल, हरियाली, शान्त वातावरण र आस्थाको गहिरो सम्बन्धलाई शब्दमा पिरोएकी छन् ।
भजन गायक सन्तु थापा र गायिका बन्दना पाण्डेको सुमधुर स्वरमा सार्वजनिक गरिएको छ । गीतको छायांकन रेसुङ्गा क्षेत्रमै गरिएको छ ।
ऐतिहासिक र प्राकृतिक सौन्दर्यले भरिएको रेसुङ्गा क्षेत्रलाई दृश्यको माध्यमबाट पनि प्रभावकारी रूपमा प्रस्तुत गरिएको छ । रेसुङ्गाको गगनचुम्बी डाँडामा उभिएको मन्दिर, जङ्गलको हरियाली, खुला आकाश र त्यहाँ पुग्ने भक्तजनहरूको भावना गीतमा जीवन्त रूपमा प्रस्तुत गरिएको छ ।
भजन गीति संग्रहमार्फत रेसुङ्गाको धार्मिक महत्त्वको प्रचार–प्रसार गर्ने र धार्मिक पर्यटकलाई आकर्षित गर्ने उद्देश्य लिएको गायक सन्तु थपाले बताए । गीतमार्फत रेसुङ्गाको आध्यात्मिक आकर्षणलाई देश विदेशसम्म पुर्याउन सकिने विश्वास गरिएको उनले बताए।
गीतले स्थानीय कला, संस्कृति र आस्थाको संरक्षण तथा प्रवद्र्धनमा समेत टेवा पुर्याउने अपेक्षा गरिएको छ । ‘रेसुङ्गा जाऔं’ भजन गीत गायक सन्तु थापाको युट्युब मार्फत सार्वजनिक गरिएको छ । गीत सार्वजनिक भएसँगै शुभेच्छुक, धार्मिक भक्तजन तथा संगीतप्रेमी दर्शक–श्रोताबाट सकारात्मक प्रतिक्रिया पाइरहेको गायक थापाको भनाइ छ ।
रेसुङ्गाको नाममा सिर्जित यो गीतले गुल्मीको पर्यटन क्षेत्रको उज्यालो परिचय दिन महत्वपूर्ण भूमिका खेल्ने विश्वास लिइएको छ । रेसुङ्गा क्षेत्रमा पर्यटकीय चहलपहल बढाउन गतवर्षदेखि रेसुङ्गा नगरपालिकाले ‘जाउँ हिड रेसुङ्गा’ अभियना समेत चलाएको छ ।
अभियान मार्फत रेसुङ्गा क्षेत्रमा पर्यटकीय गतिविधि समेत बढ्ने गरेका छन् । भजन गीति संग्रहले रेसुङ्गा क्षेत्रको पर्यटनमा थप उचाई मापुग्ने अपेक्षा रेसुङ्गा नगरपालिकाले समेत लिएको छ ।
