अनिल खत्री
८ असार, गुल्मी । गुल्मी जिल्लाको इस्मा गाउँपालिकाले स्थानीय उत्पादनलाई प्रवद्र्धन गर्ने उद्देश्यसहित कार्यक्रमहरूमा प्रदान गरिने मायाको चिनो स्वरूप सिरेमिक्सबाट निर्मित माटाका भाडा प्रयोग गर्ने भएको छ ।
गाउँपालिकाको आगामी आर्थिक वर्ष २०८२/ ०८३ कोनीति तथा कार्यक्रम सार्वजनिक गर्दै अध्यक्ष भगतसिंह खड्काले यसबारे जानकारी गराउनु भएको हो । उहाँका अनुसार पालिकामा उत्पादन हुँदै आएको माटोका भाडा तथा सिरेमिक्स सामग्रीलाई प्रवद्र्धन गर्न कार्यक्रमहरूमा प्लास्टिक वाअन्य आयातित सामग्रीको सट्टा स्थानीय भाँडाकुँडा प्रयोग गरिनेछ । यस अन्तर्गत इस्मा कोटको प्रतिमा तयार गरी मायाको चिनोको रूपमा वितरण गरिने योजना छ ।
पालिकाले यस कदमबाट स्थानीय साना उद्योगको प्रवद्र्धन हुने विश्वास लिएको छ । स्थानीय स्रोत साधनको प्रयोग गर्दै मौलिकता झल्किने सामग्रीलाई प्राथमिकता दिने नीति अपनाएको अध्यक्ष खड्काले बताउनुभयो ।
इस्माको बुल्ममा कुमाल समुदायले परम्परागत रुपमा माटाका भाडा उत्पादन गर्दै आएका छन् । अहिले आधुनिक प्रविधिको प्रयोग गरेर आधुनिक खालका विभिन्न कलात्मक माटाका भाडा उत्पादन हुदै आएका छन । तर पलास्टिक जन्य सामाग्रीका कारणले कुमाल समुदायको पेसा नै संकटमा पर्ने अवस्थामा पुगेको छ । यस्तै पालिकाले प्लास्टिकजन्य खादा तथा मालाको प्रयोगमा पूर्ण रूपमा रोक लगाउने निर्णय पनि गरेको छ ।
अब पालिकाको औपचारिक कार्यक्रमहरूमा प्राकृतिक र वातावरणमैत्री विकल्प प्रयोग गरिनेछ । त्यसैगरी इस्मा गाउँपालिकाले फूल खेतीलाई प्रोत्साहन गर्न कृषकहरूलाई आवश्यक स्रोतसाधन र प्राविधिक सहयोग उपलब्ध गराउने नीति ल्याएको छ ।
यसले फूलको माग स्थानीयस्तरमै पूरा हुनुका साथै कृषकको आम्दानी पनि बढाउने विश्वास गरिएको छ । इस्मा गाउँपालिकाको यो नीति वातावरणमैत्री, आत्मनिर्भर र स्थानीय उद्योगमुखी अभ्यासको उदाहरणको रूपमा हेरिएको छ ।
