२२ जेठ, काठमाडौं । प्रमुख प्रतिपक्षी दल नेपाल कम्युनिष्ट पार्टी (माओवादी केन्द्र) ले पार्टी अध्यक्ष पुष्पकमल दाहाल निवास खुमलटारमा आज बसेको पदाधिकारी बैठकमा भिजिट भिसाका नाममा नागरिक माथि ठगी भइरहेको विषयमा छानबिन अपरिहार्य रहेको निष्कर्ष निकालेको छ ।
‘आजको वैठकमा विशेष गरि व्यक्ति विशेषमा पार्टीको ध्यान नभएको र मुख्य विषय छानबिन समिति गठन गरी प्रभावकारी छानबिन गर्नुपर्नेमा निरन्तर छलफल भइरहेको र यसलाई सकारात्मक निष्कर्षमा भन्ने दृष्टिकोणबाट छलफल अघि बढेको’ बैठकपछि उपाध्यक्ष एवं पार्टी प्रवक्ता अग्निप्रसाद सापकोटाले बताए ।
प्रवक्ता सापकाटोले द्वन्द्वकालीन मुद्दालाई लिएर सर्वोच्च अदालतबाट आएको आदेशका बारेमा अहिले टिप्पणी गर्ने समय नभएको धारणा राखे । लिखित आदेश आएको छैन, आफ्नै ढङ्गबाट प्रचारप्रसार र व्याख्या गरिएको छ, यसका बारेमा अहिले नै छलफल गर्नुपर्ने र धारणा बनाउनुपर्ने अवस्था होइन, पूर्णपाठ आइसकेपछि मात्रै भन्न सकिन्छ प्रवक्ता सापकोटाले भने ।
बैठकमा संसद्को गतिरोध अन्त्य गर्न सिर्जनात्मक र रचनात्मक ढङ्गले अघि बढ्ने निर्णय गरिएको समेत सापकोटाले जानकारी दिए ।
