अनिल खत्री
२३ चैत, गुल्मी । आजदेखि मदन भण्डारी राजमार्गको रिडी–तम्घास सडक खण्ड एक महिना पूर्ण रुपमा बन्द हुने भएको छ ।राजमार्गको रिडी–तम्घास सडक खण्डको पानी ट्यांकीदेखि रातामाटा सम्मको बाटो बन्द हुने मदन भण्डारी राजमार्ग, योजना कार्यालय गुल्मीका प्रमुख इन्जिनियर रमेश चौधरीले बताए ।
सडक खण्डको ठुलढुङगा भिर क्षेत्रमा पहरो फोर्ने, सडक चौडा गर्ने, ग्रेड मिलाउने कार्यका लागि चैत २३ गतेदेखी वैशाख २२ गते सम्म सडक पूर्ण रुपमा बन्द रहने चौधरीले बताए । यस समय अवधिमा वैकल्पिक सडकहरु प्रयोग गर्नका लागि कार्यालयले आग्रह गरेको छ।
उक्त सडकको विकल्पमा पानीट्याङकी थोर्गा, स्याल बिसौनादेखि रातामाटा सडक हुदै रिडी, पिपलनेटा दिगाम हुँदै रिडी, लुम्छा, धरमपानी, दिगाम हुँदै रिडी र घुम्ती, चारपाला,खरज्याङ हुँदै रिडी सडक खण्ड प्रयोग गर्नका लागि कार्यालयले आग्रह गरेको छ ।
अहिले रिडी–तम्घास सडक स्तर उन्नतीको काम तीव्र गतीमा अगाडी बढेको छ । सडक ट्याक खुलेको ४३ वर्षपछि स्तर उन्नती भइरहेको छ । मदन भण्डारी राजमार्गको गुल्मी खण्डको रिडी–तम्घास सडकको राजासम्म स्तरउन्नती गर्ने कार्य हुँदै आएको छ । सडकको २५ किलोमिटर क्षेत्रमा अहिले स्तर उन्नतीको काम तिव्र रुपमा भइरहेको छ ।
राजमार्गको ५५ प्रतिशत भौतिक प्रगती र ४५ प्रतिशत वित्तिय प्रगती भएको मदन भण्डारी योजना कार्यालयका सूचना अधिकारी इन्जिनियर हुमानाथ पौडेलले बताए । निर्माण व्यवसायीले आउदो असारसम्म ८ किलोमिटर कालोपत्रे, ३ किलोमिटर ढलानको काम सम्पन्न गर्ने गरि काम अगाडी बढेको उनले बताए ।
वर्खा सम्म २५ किलोमिटर क्षेत्रको नाली निर्माण र ग्राभेलको काम पनि सम्पन्न हुने इन्जिनियर पौडेलले बताए । सडकको कटिङ्गको काम सकिएको समानन्तर इलाइट जेभीले जनाएको छ ।
सवारी साधनको बृद्धिसँगै पुरानो बाटोले साँघुरो हुँदै गएपछि रिडीबाट तम्घास सम्मको ४५ किलोमिटर सडक बिस्तार हुँदैछ । पहिलो चरण २५ किलोमिटर सडक स्तर उन्नती सँगै कालोपत्रे हुन लागेको हो ।
मदन भण्डारी राजमार्गको रिडी–तम्घास सडक खण्डमा समान्तर इलाइट जेभीले निर्माण कार्य गर्दै आएको छ । २०७९ साल फागुन २८ गते सम्झौत भइ २०८२ साल फागुन २५ गतेसम्म काम सम्पन्न गर्नुपर्ने म्याद रहेको छ ।
१ अर्व ५० करोड ४८ लाख ३२ हजार ९५९ रुपैयाँको लागतमा सडक स्तर उन्नती र कालोपत्रे गर्ने गरि ठेक्का सम्झौता भएको मदन भण्डारी राजमार्ग योजना कार्यालयले जनाएको छ ।
