म्यानमारमा गएको भूकम्पपछि नेपाल सरकारले त्यहाँ मेडिकल सहायता सहित नेपाली सेनाको २२ सदस्यीय टोली पठाएको छ। टोलीमा भूकम्प प्रभावितका लागि औषधि, उपकरणहरु सहित सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरु रहेको नेपाली सेनाले जनाएको छ ।
म्यानमारमा हालै गएको विनाशकारी भूकम्पका कारण भएको व्यापक धनजनको क्षति पश्चात् नेपाल सरकारको निर्णय बमोजिम मेडिकल राहत सहित नेपाली सेनाको टोली आज चैत्र २० गते त्यसतर्फ प्रस्थान गरेको नेपाली सेनाले जानकारी दिएको छ । उक्त टोलीले करिब एक साता म्यानमार भूकम्पमा परी घाइते भएकाहरूको स्वास्थ्य उपचारमा खटिई सेवा प्रदान गर्नेछ ।
म्यानमारको राजधानी नापिडो आसपास केन्द्र गरी गएको ७.७ म्याग्निच्युडको भूकम्पमा परी हालसम्म दुई हजारभन्दा बढी मानिसको मृत्यु भएको छ। उक्त भूकम्पबाट तीन हजार बढी घाइते भएको त्यहाँका सञ्चार माध्यमले जानकारी दिएको छ।
