अनिल नेपाली
अर्घाखाँची – दलित समुदायको सशक्तिकरणको लागि दलित समुदायको एकता जरुरी रहेको अर्घाखाँचीका प्रमुख जिल्ला अधिकारी बाबुराम अर्यालले बताएका छन ।
बिट्रिस काउन्सिल तथा दलित लाइभ म्याटरको सहयोग र रूपान्तरणका लागि आवाज नेपालको समन्वयमा आयोजित कार्यक्रममा मन्तब्य राख्दै प्रजिअ अर्यालले यस्तो बताएका हुन। प्रजिअ अर्यालले संविधानमा दलित अधिकारका थुप्रै सवाल समेटिए पनि कार्यान्वयनमा केही कमजोर देखिएको बताए ।
उनले दलित आयोग, राजनीतिक दलका भातृसंठन र दलित अधिकारकर्मी लगायतले पनि आफ्नो भूमिका प्रभावकारीरुपले खेल्न नसकेको धारणा राख्दै छुवाछूतको समूल नष्ट गर्न राज्यका तीनै तहका सरकारको भुमिका महत्त्वपूर्ण हुने बताउदै अमानवीय उत्पीडन र ज्यादतीमा पर्दै आएका दलित समुदायको संवैधानिक हक अधिकारको प्रभावकारी कार्यान्वयनका निम्ति राज्य र यसका निकायहरू जिम्मेवारपूर्ण ढङ्गले प्रस्तुत हुनुपर्नेमा जोड दिनुभयो ।
उहाँले छुवाछूत तथा जातीय विभेदजन्य कार्य गम्भीर सामाजिक अपराधका रूपमा कानुन बमोजिम दण्डनीय हुने व्यवस्था भइसकेकाले राज्यका सबै जिम्मेवार तह र निकायले यसलाई प्रभावकारी कार्यान्वयन गर्न दलित समुदायको एकताका लागि समुदायको एकता एकीकृत हुनुपर्ने बताएका थिए ।
कार्यक्रममा प्रहरी निरिक्षक जगनाथ मरासिनीले जिल्लामा दलितको बस्तुगत स्थिति, हालको अबस्था, कानुनी जटिलता, परामर्श, कानुनी उपाय लगायतको बारेमा अनुशिक्षण समेत दिनु भएको थियो ।
कार्यक्रममा पत्रकार महासंघ लुम्बिनी प्रदेशका कोषाध्यक्ष प्रेमनारायण आचार्य, आधिकारिक ट्रेड युनियनका अध्यक्ष कुष्ण बर्मा लगायतले शुभकामना मन्तब्य राख्दै दलित समुदाय अब जागरुक र एकीकृत हुनुपर्ने बताएका थिए । कार्यक्रम सुरक्षा निकायका प्रमुख तथा प्रतिनिधि दलित अधिकारकर्मी लगायत दलित सङ्ग सम्बन्धित सबै अगुवाको सहभागीता रहेको थियो ।
कार्यक्रम कार्यक्रम संयोजक अनिल नेपालीको अध्यक्षता र नवीन रसाइलीको सञ्चालनमा सम्पन्न भएको थियो । कार्यक्रममा अर्घाखाँची जिल्लामा भएका दलितका समस्याको बारेमा दलितअगुवा सन्जय नेपाली,राम ब सुनार, सन्जु नेपाली, माया नेपाली लगायतले धारणा प्रस्तुत गरेका थिए ।
