अनिल खत्री
२१ फागुन, गुल्मी । गुल्मी जिल्लाको इस्मा गाउँपालिका वडा नम्बर–५ कुखुरे खोलामा निर्माणधिन पक्की पुल लामो समयदेखि अलपत्र अवस्थामा परेको छ । निर्माण व्यवसायीले समयमै पुल निर्माणको काम सम्पन्न गर्न नसक्दा वषौं देखि अलपत्र हुँदै आएको हो ।
पक्की पुल निर्माणका लागि दुबै तर्फका पिल्लर निर्माण गरिएको छ । त्यो बाहेकको अन्य काम भने अलपत्र अवस्थामा रहेको छ ।
पुल निर्माणको लागि १ वर्षको अवधी तोकिए पनि चार वर्ष बित्दा समेत निर्माण हुन सकेको छैन् । पुल नहुँदा वारि–पारि आउ–जाउ गर्नेसवारी साधन तथा स्थानीयले सास्ती खेप्दै आएका छन् ।
पक्की पुन समयमै नबन्दा वर्षातको समयमा यस भेगका नागरिकहरु जोखिम मोलेरै खोला तर्नुपर्ने अवस्था रहेको छ । पुल निर्माणको लागि सडक पूर्वधार विकास कार्यालय मार्फत अत्रेय भुसाल, बस्नेत, जेवी काठमाडौंले निर्माणको जिम्मा लिएको कार्यालय प्रमुखइ न्जिनियर सचितान्द चौधरीले बताउनुभयो ।
२५ मिटर लम्वाई रहेको २ करोड ४३ लाख ३७ हजार ७०६ रुपैया भ्याट बाहेकको लागतमा पुल निर्माणको ठेक्का लागेको थियो । पुलको ५० प्रतिशत भौतिक प्रगति र ४५ प्रतिशत वित्तिय प्रगतीमा अलपत्र अवस्थामा रहेको कार्यालयले जनाएको छ ।
सडक पूर्वाधार कार्यालय तम्घास गुल्मी मार्फत २०७७ साल माघ २१ गते ०७८ साल १० माघ १७ गते सम्पन्न गर्ने गरि सम्झौता भएको छ । पहिलो पटक तोकिएको मितिमा काम सम्पन्न हुन नसकेपछि पुनः ०८१ साल ६ असोज ३० गते सम्पन्न गर्ने गरि ३ पटक म्यादथप गरिएको कार्यालय प्रमुख चौधरीले बताउनुभयो ।
म्याद थप भएको यो अवधीमा पनि पुल निर्माणले गति लिन नसकेर म्याद सकिएको छ । पुल निर्माण गर्ने निर्माण व्यवसायीले अलपत्र पारेर सम्पर्क बिहिन भएका छन् । जसका लागि कार्यालयले पनि ताकेता गर्दै आएको छ । तर पनि निर्माण व्यवसायी टेर्ने गरेको पाइएको छैन् ।
पक्की पुल निर्माणको नियमित काम भएको भए गएको असोज सम्ममा काम सकिएर पुल सञ्चालनमा आउने समय हो । तर निर्माणको काम समयमै नसक्दा पक्की पुलको वारिपारिका पिल्लर निर्माण भएपनि अन्य काम नहुँदा पुल निर्माण अलपत्र बनेको छ ।
पक्की पुल समयमै नबन्दा वर्षातको समयमा ग्रामीण क्षेत्रको व्यापारिक केन्द्र कुखुरे खोला बजारसम्म किनमेल गर्न जानको लागि सास्ती हुने गरेको इस्मा गाउँपालिका वडानम्बर–५ का स्थानीय मुक्तबहादुर महतराले बताउनुभयो ।
वारिपारि खेत रहेकाले स्थानीयले वर्षातको समयमा खोला तर्न समस्या हुने गरेको उहाँले बताउनुभयो । वषौंदेखि पुल निर्माण कार्य अलपत्र हुनु दुखद पक्ष रहेको इस्मा गाउँपालिका वडानम्बर–६ कुखुरे खोलाका स्थानीय हिरा जिसीले बताउनुभयो ।
उहाँले सम्बन्धीत निकायसमक्ष पुल निर्माण कार्यका लागि ताकेता गरेपनि कहि कतैबाट सुनुवाइ हुन नसकेको दुखेसो गर्नुभयो ।निर्माण व्यवसायीले स्थानीय स्तरमा काम गर्ने क्रममा केहि पसलहरु तिर्नुपर्ने रकम समेत नतिरेको स्थानीयको गुनासो रहेको छ ।
पक्की पुल निर्माण हुन्छ भनेर उब्जाउ योग्य जग्गा दिएपनि समयमै निर्माण नहुँदा स्थानीय आक्रोसित बनेका छन् । पुल निर्माणको लागि स्थानीय सरकारले पनि समन्वय गर्दै आएको छ । तर सोचे अनुसारको निर्माणले गति लिन नसक्नुले नागरिकले दुखः झेल्नु परेको इस्मा गाउँपालिका वडानम्बर–६ का वडा अध्यक्ष ढालबहादुर कुँवरले बताउनुभयो । उहाँले पुल निर्माण स्थल वडानम्बर–५ मा रहेपनि वडानम्बर–६ का नागरिकका लागि अत्यन्तै आवश्यक रहेको बताउनुभयो ।
समयमै पुल निर्माणको लागि पालिकाले सम्बन्धीत कार्यलयलाई जानकारी गराउदै आएपनि परिणाम भने शुन्य जस्तै रहेको कुँवरले बताउनुभयो । वषौंदेखि निर्माण कार्य अलपत्र बन्दा नागरिकको आक्रोस बढदै गएकाले कार्यालय र निर्माण व्यवसायी जिम्मेवार बनेर निर्माण कार्य सम्पन्न गर्न वडा अध्यक्ष कुँवरले आग्रह गर्नुभयो ।
निर्माण व्यवसायीले काम अपलत्र परेपछि कार्यालयले पनि एक्सनमा उत्रिएर धरौटी तान्ने प्रक्रिया अगाडी बढाइएको सडक पूर्वाधार कार्यालयका सब–इन्जिनियर प्रकाश ढकालले बताउनुभयो । पटकपटकको आग्रहलाई निर्माण व्यवसायीले वेवास्ता गर्ने गरेको उहाँको भनाइ छ ।
