गुल्मीको इस्मा गाउँपालिकामा कपडा बैंक स्थापना गरिएको छ । कपडा बैंकको इस्मा गाउँपालिकाका अध्यक्ष भगतसिंह खड्का रअभियन्ता तथा Cloth and Food Bank Nepal का अध्यक्ष कमल जिसीले संयुक्त रूपमा शुभारम्भ गरेका हुन् ।
कपडा बैंक गाउँपालिकाको सहकार्यमा Cloth and Food Bank Nepal ले स्थापना गरेको हो । शुभारम्भ कार्यक्रममा प्रमुख अतिथि इस्मा गाउँपालिकाका अध्यक्ष भगतसिंह खड्का, विशिष्ट अतिथि समाजसेवी नारायण पैयानी, इस्मा गाउँपालिका–१ का वडा अध्यक्ष सेर बहादुर कुँवर, श्री आनन्दपुर माध्यमिक विद्यालय व्यवस्थापन समितिका अध्यक्ष नारायण रिजाल, विद्यालयका प्रधानाध्यापक शंकर प्रसाद गैरे लगायतका विशिष्ट व्यक्तिहरूको उपस्थिति रहेको थियो । कार्यक्रमको अध्यक्षता Cloth and Food Bank Nepal का संस्थापक तथा अध्यक्ष कमल जिसीले गरेका थिए ।
गाउँपालिका अध्यक्ष खड्काले इस्माको आगलागीमा खुला आकाशमुनि जीवन बिताउन बाध्य भएकाहरूको तत्कालीन अवस्थाको स्मरण गर्दै विपद्का बेला अत्यावश्यक सामाजिक कार्यका लागि Cloth and Food Bank Nepal र अध्यक्ष कमल जिसीलाई आभार प्रकट गरे । उनले सामाजिक भावनाको संकटका वेला यो अभियानले सबैलाई सकारात्मक बनाउन सहयोग पुग्ने विश्वास व्यक्त गरेका छन ।
०८० फागुन ५ गते बुटवलबाट सुरु भएको कपडा बैंक अभियानले “आफ्नो घर, टोल र समाजलाई सफा राखौँ, कोही कपडा विहीन नरहून्” भन्ने उद्देश्य लिएको अध्यक्ष जिसिले बताए । संस्थाका अध्यक्ष कमल जिसीका अनुसार अहिलेसम्म बैंक मार्फत १,१०० भन्दा बढी घरपरिवारमा कपडा वितरण गरिएको छ भने १६० भन्दा बढी निकायसँग बैंक जोडिएको छ।
बाढी, पहिरो र आगलागी जस्ता विपद्मा सहयोग पुर्याउँदै आएको कपडा बैंकले सामाजिक सहयोग र सहानुभूति प्राप्त गर्नुका साथै फोहोर व्यवस्थापन, आर्थिक उपयोगिता, राष्ट्रनिर्माणमा योगदान र संसाधनको सही उपयोगमा पनि टेवा पुर्याइरहेको अध्यक्ष जिसीले बताए। उनका अनुसार प्रयोगमा नआएका सामग्री पुनः प्रशोधन गरेर आवश्यक पर्नेहरूलाई निःशुल्क वितरण गर्ने लक्ष्यसहित बैंक सञ्चालन गरिएको हो।
कपडा बैंक सञ्चालनको अवधि १० वर्षका लागि तोकिएको छ। पाँचदेखि सात सय किलो कपडा राख्न मिल्ने बक्सहरू राखिने छन्।बैंकले कपडा संकलन, सर्टिङ, वासिङ, सेनिटाइजिङ, प्याकेजिङ र वितरण जस्ता कार्य गर्नेछ । यस अघि जिल्लाको चन्द्रकोट गाउँपालिकामा पनि कपडा बैंक स्थापना भइसकेको जिसिले जानकारी दिएका छन ।
