२६ माघ, काठमाडौं – सिंहदरबार स्थित खानेपानी तथा सरसफाइ मन्त्रालयको चौथो तलामा आज बिहान आगलागी भएको छ । बिहान करिब ७:४५ तिर सुरु भएको आगलागी बाट चौथो तलामा रहेका ३ वटा कोठामा क्षति पुगेको छ ।
आज बिहान लागेको आगो नियन्त्रणका लागि बारुणयन्त्र प्रयोग गरी निभाउने प्रयास भइरहेको सिंहदरबार सुरक्षा गणका प्रमुख, प्रहरी नायब उपरीक्षक (डीएसपी) दिनेश घिमिरेले जानकारी दिएका छन ।
उक्त तलामा खानेपानी तथा सरसफाइ मन्त्रीको कार्यकक्ष समेत रहेको छ। आगलागीका कारण अझै खुल्न सकेको छैन भने तीन वटा कोठामा क्षति पुगेको अनुमान गरिएको छ ।
सिंहदरबार स्थित सोही भवनमा भौतिक पूर्वाधार तथा यातायात मन्त्रालय समेत रहेको छ । आगलागी नियन्त्रण प्रयास जारी रहेको र अहिलेसम्म ३ वटा कोठाका कागजात जलेर नष्ट भएको बताइए पनि क्षतिको विस्तृत विवरण संकलन भइरहेको सुरक्षा स्रोतले जनाएको छ।
