२० पौष-गुल्मीको मदाने गाउँपालिका उपाध्यक्ष सरिता खड्का र धुर्कोट गाउँपालिका उपाध्यक्ष सिता गिरी ‘शी लिड्स आइकन’ अवार्डबाट सम्मानित भएका छन ।
देशभरका महिला जनप्रतिनिधिको उल्लेखनीय योगदानलाई सम्मान सहित प्रदान गरिएको ‘शी लिड्स आइकन’ गुल्मी जिल्लाका यि २ महिला जनप्रतिनिधिले प्राप्त गरेका हुन भने लुम्बिनी प्रदेशभर यो अवार्ड प्राप्त गर्ने महिला जनप्रतिनिधीको सङ्ख्या ७ रहेको छ ।
देशभरका स्थानिय तहबाट प्राप्त १ सय ४० आवेदनमध्ये २७ प्रेरणादायी महिला जनप्रतिनिधिलाइ छनोट गरी सि लिड्स ‘आइकन’ घोषणा गरिएको हो । अवार्ड हस्तान्तरण कार्यक्रममा महिला स्वास्थ्य, महिला उद्यमशीलता, नीति र न्याय, सशक्तीकरण र जवाफदेहिता’ जस्ता क्षेत्रमा उत्कृष्ट योगदान पुर्याएको भन्दै सम्मान गरिएको हो ।
शुक्रवार काठमाण्डौमा आयोजित एक कार्यक्रमका बीच प्रधानमन्त्री केपी शर्मा ओलीले उक्त अवार्ड प्रदान गर्नुभएको हो । कल्प इम्पावर वेमेन नेपालद्वारा आयोजित यस कार्यक्रमलाई महिला सशक्तीकरणको नयाँ दिशामा लैजाने युवा पुस्ताको प्रयासका रूपमा हेरिएको छ । महिला सशक्तीकरण, उद्यमशीलता र नेतृत्वलाई प्रबर्धन गर्न आयोजना गरिने यो कार्यक्रमले स्थानीय तहका जनप्रतिनिधिको सशक्त भूमिका उजागर गर्दै देशभरका महिलालाई प्रेरणा दिने अपेक्षा गरिएको छ ।
अवार्ड प्राप्त गरे पश्चात मदाने र धुर्कोट गाउँपालिका उपाध्यक्ष क्रमस सरिता खड्का र सिता गिरीले यो ठाउँ सम्म पुर्याउन सहयोग पुर्याउनुहुने गाउँपालिकाका अध्यक्ष, अन्य जनप्रतिनिधी, प्रमुख प्रशासकीय अधिकृत लगायत अन्य कर्मचारी र समग्र पालिकावासी जनसमुदायलाइ धन्यवाद दिएका छन ।
