अनिल नेपाली
अर्घाखाँचीको सन्धिखर्क नगरपालिका वडा नं १ मा बिगत लामो समयदेखि सञ्चालनमा रहेको छायाँ अस्पतालले आज देखि ‘सिटी स्क्यान’ सेवा सञ्चालनमा ल्याउने भएको छ । आज एक कार्यक्रमको बिच सिटी स्क्यान सेवाको आरम्भ गरिएको हो ।
लामो समय देखि जिल्लामा सञ्चालनमा रहेको अस्पतालमा सिटी स्क्यान सेवा सञ्चालनमा ल्याउँदा बिरामीलाई थप सुविधा प्राप्त हुने अस्पतालका सञ्चालक डा.प्रदिपजङ केसीले बताए । उनले बिरामीको रोग पत्ता लगाउन सहज भएसँगै अस्पतालले प्रवाह गर्ने सेवा र अस्पतालप्रतिको विश्वास जनतामा थप हुने बताउदै सिटी स्क्यान जिल्लामा आएसंगै सामान्य बिरामीहरुले उपचारको लागि बुटवल, काठमाडौं जानुपर्ने बाध्यता अन्त्य भएको बताए ।
मानव शरीरको भित्री अङ्गका रोग तथा चोटपटक जानकारी लिन अति नै महत्वपूर्ण रहेको सिटी स्क्यान उपकरणले मस्तिष्क, टाउको, घाँटी, छाती, पेट, आन्द्रा, कलेजो, फोक्सो, नशा लगायत शरीरको भित्री अङ्गको रोगको पहिचानका लागि प्रभावकारी मानिने गरिएको छ । यस उपकरणका सहायताले सघन प्रकृतिका रोगको समस्या पहिचान गरेर त्यसको समयमै निदानका लागि प्रभावकारी मानिने गरिन्छ ।
‘सिटी स्क्यान सेवा उपभोगका लागि रोगका प्रकृति र जाँच गर्नुपर्ने अवस्था सिटी स्क्यानको सबै सुविधा उपभोग गर्न जिल्ला बासिले पाउने जिल्ला अस्पतालका प्रमुख डा.जगनाथ तिवारीले बताए ।’ उनले जिल्लामा सञ्चालनमा रहेको निजी अस्पतालले जिल्ला बासिलाई थप सुविधा दिने गरि थप सेवा सञ्चालन गरेकोमा धन्यवाद दिँदै यस्ता किसिमका सुविधा थप उपलब्ध हुनुपर्ने बताएका थिए ।
कार्यक्रममा न्युरो सर्जन डा.के आई सिंह केसी,नाक,कान,घाँटी रोग बिशेषज्ञडा.प्रकाश बस्नेत, रेडोयोलोजिष्ट डा.बसन्त शर्मा ले सिटी स्क्यानको बारेमा जानकारी दिएका थिए ।
अस्पतालका सञ्चालक दल बहादुर केसिले अस्पताल मन्दिर,डाक्टर पुजारी र बिरामी भगवान भएकोले अस्पतालले जुनसुकै समयमा पनि सहज सेवा प्रदान गर्ने बताएका थिए ।
अस्पतालले हाल फिजिसियन सेवा, मुटु रोग सेवा , महिला तथा प्रसूति रोग सेवा, स्त्री रोग सेवा, हाडजोर्नी तथा नशा रोग सेवा सहतिका सेवाहरु दिईरहेको छ भने अस्पतालमा एपेन्टीसाइटिस, सिजल इसेक्सन,इक्युपिट लगायतका अप्रेसन हुने गरेको अस्पतालले जनाएको छ । अस्पतालमा सेवा लिन अर्घाखाँची सहित छिमेकी जिल्ला गुल्मी, प्युठान लगायतका ठाउँ बाट बिरामीहरु उपचारका लागि आउने गरेका छन ।
