अनिल नेपाली
जिल्ला प्रशासन कार्यालय अर्घाखाँचीको नेतृत्वमा गरिएको संयुक्त बजार अनुगमनमा बिहिबार एकैदिन हजारौं बढी मूल्यको अखाद्य सामग्री बरामद गरि नष्ट गरिएको छ ।
अर्घाखाँची जिल्लामा पछिल्लो केही दिनयता बजार अनुगमनलाई तीव्रता दिईएको छ । जिल्ला सदरमुकाम सन्धिखर्क चुत्राबेशी क्षेत्रमा रहेका बजारमा गरिएको अनुगमनमा प्रमुख जिल्ला अधिकारी बाबुराम अर्याल नेतृत्वको टोलीले हजारौं रुपैयाको अखाद्य वस्तु बरामद गरी नष्ट गरेको प्रशासकीय अधिकृत नुमलाल पन्थीले बताए ।
अनुगमनका क्रममा बढी मात्रामा म्याद नाघेका चिउरा, भुजिया दाना, दालमटरहरु, बिस्कुट, खाने तेल, सोयबिन, काजु बदाम, चाउचाउ, मसालाहरु भेटिएका थिए । उपभोक्ताको स्वास्थ्यलाई ध्यानमा राख्दै बजारमा हुने गरेको कालोबजारी, नियमविपरीत मूल्य, म्याद नाघेका खाद्य वस्तुहरुको नियन्त्रणगर्नका लागि बजार अनुगमन गरिएको प्रमुख जिल्ला अधिकारी बाबुराम अर्यालले बताए ।
उक्त अनुगमन टोलीले खाद्य सामग्रीको म्याद, गुणस्तर, अवस्था, व्यवसायीले सम्बन्धित निकायमा दर्ता आबद्धता कागजातहरू सबैले देख्ने गरी राख्ने गरे–नगरेको, व्यवसायको नाम, मूल्यसूची हेर्नुका साथै प्यान र पसल दर्ता गरिएको फर्म उपभोक्ताले देख्ने गरी राख्न व्यवसायीलाई निर्देशन दिएको थियो ।
अनुगमनमा प्रशासन, उद्योग वाणिज्य संघ,चेम्बर अफ कमर्स , घरेलु तथा उद्योग विकास कार्यालय, सञ्चारकर्मी लगायतको सहभागिता रहेको थियो ।
